Kompanitë shqiptare do të blejnë grurin vendas, si zgjedhjen primare të lëndës së parë për fabrikat e tyre të miellit dhe prodhimit të bukës, duke ndihmuar fermerët që janë dëmtuar nga rritja e kostove dhe rënia e çmimit të grurit.
Lajmin e bëri të ditur ministrja e Bujqësisë dhe Zhvillimit Rural, Frida Krifca, në përfundim të një takimi që zhvilloi me përfaqësuesit e Shoqatës së Miellit si dhe Shoqatës së Bukës, Brumërave dhe Pastiçerive.
“Jemi dakordësuar së bashku që prioritet në këtë sezon të korrjeve të grurit patjetër që do t’i japim mbështetje prodhimit vendas dhe fermerëve tanë, të cilët na kanë dëgjuar dhe janë orientuar drejt prodhimit të grurit gjatë sezonit të kaluar”, u shpreh Krifca.
Ajo theksoi se “vendimmarrja jonë ka qenë për të rritur prodhimin e grurit vendas, në kushtet e një situate të pazakontë, dhe qeveria shqiptare i është përgjigjur një momenti të luhatshëm gjeopolitik, i cili solli nevojën për të mbështetur pikërisht prodhimit grurit”.
Krifca tha se, u mbështetën me subvencione rreth 4 mijë fermerë me një sipërfaqe të konsiderueshme të prodhimit të grurit, teksa paralelisht fermerët u ndihmuan për punime të mekanizuara me naftë pa taksa, vitin e kaluar, por edhe këtë vit.
Krifca nënvizoi se sfida kryesore është garantimi i grumbullimit dhe shitja e grurit tek fabrikat e miellit në vend.
“Me përfaqësues të këtij sektori jemi ulur dhe kemi diskutuar gjerësisht mbi nevojat e sektorit, kapaciteteve të rezervave të grurit që kemi aktualisht, mbi nevojat që ka sektori për të blerë grurin dhe kemi dakordësuar bashkërisht që orientimi ynë primar do të jetë shitja e prodhimit vendas”, tha ministrja.
Krifca deklaroi se, për kompanitë e blojes zgjedhja e parë do të jetë prodhimi vendas i grurit. Janë dy shoqata që janë dakortësuar për blerjen e grurit shqiptar nga fermerët.
Ministrja shprehu angazhimin se do të jetë në një kombinim të vazhdueshëm ecuria e këtij procesi, pasi janë faktor të bursës, tregjeve ndërkombëtare dhe ato gjeopolitike që përcaktojnë çmimet e tregut.
Krifca, tha se ”duke qenë në një komunikim të vazhdueshëm dhe dialog të hapur, me aktorët e tregut, sigurisht që jemi në gjendje t’i përgjigjemi nevojave të vendit më së miri”.
Krifca theksoi se sfida është garantimi i grumbullimit dhe shitja tek fabrikat shqiptare të miellit e grurit vendas. Në takimin me kompanitë shqiptare të cilat merren me importin e drithërave, ministrja u kërkoi të mbështesin dhe grumbullojnë prodhimin tonë të grurit. Ajo i ftoi kompanitë shqiptare të cilat importojnë grurë të fokusohen tek blerja e grurit vendas.
