Kryeministri Edi Rama ka bërë me dije shqiptarët që do të riatdhesohen janë vetëm ata që situata e shpërthimit të koronavirusit i la jashtë shtetit. Pra bëhet fjalë për ata që janë ikur për pak kohë, duke përjashtuar ata që kanë jetuar prej vitesh jashtë.
Rama thotë se lista me emrat e atyre që do të kthehen është mbyllur dhe tashmë telefonatat janë të kota.
Gjithashtu një mesazh kryeministri ia adresoi atyre që janë kundër riatdhesimit të shqiptarëve, me frikën se do të na sjellin flamën. Rama thotë se para përhapjes së virusit, në Shqipëri erdhën 130 mijë shqiptarë dhe nuk na sollën flamën, falë sjelljes së tyre.
“Edhe vetë Kina ka ndaluar marrjen e shtetasve të saj nga jashtë. Jemi këtu për ti dhënë mundësinë atyre që kanë nevojë vërtetë. Dua të sqaroj se do të kthehen ata që shpërthimi i koronavirusit i la të ngecnin atje. Pra nuk bëhet fjalë për ata që jetojnë atje dhe thonë hajde se po vijmë me këtë rast.
Është një listë e mbyllur, e verifikuar një për një, me studentë, njerëz që kanë mbetur në rrugë dhe jo një listë e hapur dhe të fillojnë telefonatat, me argumentin hajde ikim se atje në Shqipëri koronavirusi nuk po bën hatanë, si këtu ku jemi.
Lasgushi do të mbledhë në pikat që Ministria e Infrastrukturës do të publikojë dhe me listat e publikuara nga ambasadat, edhe asnjë më shumë.
Dua t’ju them shumëkujt që ankohen dhe që kanë vënë kujën se përse i marrin ata nga jashtë, se do na sjellin virusin.
Kjo është të flasësh në hava. Ne na erdhën 130 mijë persona nga Italia, para fillimit të situatës dhe falë sjelljes së tyre nuk po shohim të na kenë sjellë flamën.
Edhe në këto kohë lufte me cinizma dhe ironira. Ne jemi në luftë dhe pastaj mos thoni pse i përgjigjem disave drejtpërdrejtë”, tha Rama.
