Për arrestimin në Itali të Elmilind Dylit, një prej autorëve të dyshuar për masakrën e Velipojës me 4 të vrarë dhe 2 të plagosur, Policia ka dalë me njoftim zyrtar.
Policia njofton se prej disa ditësh kishin siguruar informacion se në zonën e Riminit fshihej një shtetas i kërkuar për vrasje. Bazuar në këto informacione, Policia e Riminit organizoi operacionin policor të koduar “Rimini”, në kuadër të të cilit lokalizoi, kapi dhe shoqëroi Elmilind Dylin.
Pas verifikimeve, mëngjesin e sotëm është bërë identifikimi i thelluar i Elmilind Dylit, i cili u arrestua me qëllim ekstradimin drejt Shqipërisë.
Dyli ishte shpallur në kërkim ndërkombëtar nga Interpol Tirana për veprat penale “Vrasja” dhe “Prodhimi dhe mbajtja pa leje e armëve, armëve shpërthyese dhe municionit luftarak”, në lidhje me ngjarjen e ndodhur në vitin 2021, në Velipojë, ku mbetën të vrarë me armë zjarri 4 persona.
Konflikti në fjalë ndodhi më 27 qershor të 2021-t mes familjes Gocaj dhe Verracaku. Palët ishin pronarë hotelesh në Velipojë dhe shkak për ngjarjen e rëndë u bë një konflikt për vendosjen e çadrave në plazhin para bizneseve të tyre.
Nga të shtënat mbetën të vrarë më armë zjarri vëllezërit, Edmond e Xhovani Gocaj, kamarieri i biznesit të tyre Myrezim Zeneli, si dhe Kujtim Verracaku.
Ndërsa të plagosur mbetën Hasan Verracaku dhe Elmilind Dyli. Këta të fundit u arrestuan pas ngjarjes së rëndë dhe në atë kohë, gjykata i la në burg pa afat.
Gjithçka ndodhi kur familja Verracaku shkoi në hotelin e familjes Gocaj, që ndodhet pak metra larg biznesit të tyre, për t’u sqaruar për ndarjen e parcelave në plazh. Por sherri degradoi në përdorimin e armëve duke u shndërruar në tragjedi
Njoftimi i Policisë:
Lokalizohet, kapet dhe vihet në pranga me qëllim ekstradimin drejt Shqipërisë, një shtetas shqiptar i kërkuar për vrasje dhe për armëmbajtje pa leje.
Falë inteligjencës policore, bashkëpunimit të ngushtë me zyrën e Interforcës italiane në Shqipëri, si dhe shkëmbimit të informacionit në kohë reale me Interpol Romën, u finalizua nga Policia italiane, operacioni policor i koduar “Rimini”.
Strukturat e Policisë së Shtetit, prej disa ditësh, kishin siguruar informacion se në zonën e Riminit fshihej një shtetas i kërkuar për vrasje. Interpol Tirana bashkëpunoi ngushtë me zyrën e Interforcës italiane në Shqipëri dhe me homologët e Interpol Romës, për shkëmbimin në kohë reale të këtij informacioni.
Policia e Riminit, bazuar në këto informacione, organizoi operacionin policor të koduar “Rimini”, në kuadër të të cilit lokalizoi, kapi dhe shoqëroi shtetasin e kërkuar ndërkombëtarisht, autor të dyshuar për vrasje.
Pas verifikimeve të thelluara të kryera ndërmjet Policisë shqiptare dhe asaj italiane, mëngjesin e sotëm është bërë identifikimi i shtetasit të shoqëruar E. D., i cili u arrestua me qëllim ekstradimin drejt Shqipërisë.
Shtetasi E. D. ishte shpallur në kërkim ndërkombëtar, nga Interpol Tirana, për veprat penale “Vrasja” dhe “Prodhimi dhe mbajtja pa leje e armëve, armëve shpërthyese dhe municionit luftarak”, në lidhje me ngjarjen e ndodhur në vitin 2021, në Velipojë, ku mbetën të vrarë me armë zjarri, 4 shtetas.
