13 Tetori është data e re kushtetuese për zgjedhjet vendore, thotë Presidenti Ilir Meta në një postim në Facebook.
Kreu i shtetit apelon për qetësi dhe për t’u shmangur provokimet, edhe pse qeveria do të zhvillojë votimet të dielën e 30 Qershorit.
Thirrja e Presidentit është për të mos u konfrontuar me qytetarët që do të dalin për votime në 30 Qershor, të cilat Meta i ka quajtur “votime socialiste” dhe ka publikuar një video gjatë zgjedhjeve në periudhën komuniste.
“Ata që do votojnë, vetë do t’i numërojnë”, deklaron Presidenti, teksa nuk kursen as ironinë që këto votime t’i shoqërojnë me festime e daulle.
Deklarata e Presidentit Ilir Meta:
“Mirëdita të dashur qytetarë!
Nga dje, data kushtetuese e zgjedhjeve vendore është 13 tetor 2019.
Situata është e qartë dhe e padiskutueshme nga ana ligjore dhe kushtetuese.
Gjithsesi kryeministri po insiston për të shkuar në votime socialiste në datën 30 qershor 2019.
Ju këshilloj ta merrni atë me qetësi e mençuri, dhe të mos bini pre e provokimeve, sepse ato u shërbejnë vetëm atyre që duan të legjitimojnë kapjen totale të shtetit dhe instalimin e një regjimi njëpartiak.
Të dashur qytetarë,
T’i respektojmë dhe të mos konfrontohemi me të gjithë ata bashkëqytetarë që do të shkojnë në këto votime socialiste.
Konfrontimi dhe dhuna nuk i shërben Shqipërisë dhe së ardhmes së saj europiane, dhe sidomos bashkëjetesës sonë qytetare në çdo familje, në çdo lagje, në çdo fshat, në çdo komunitet dhe në të gjithë shoqërinë tonë.
Mos u nervozoni nga provokimet që do t’ju bëhen për t’ju çuar drejt dhunës.
Ndoshta e teproj, por për t’i shijuar tamam votimet socialiste dhe për t’ju rikthyer qoftë dhe për 1 ditë asaj periudhë 45-vjeçare, shoqërojini me dajre e daulle si njëherë e një kohë.
Ata vetë do votojnë, vetë do t’i numërojnë.
Të gjithë shqiptarët së bashku, në mënyrë demokratike, të fshehtë, të lirë dhe të ndershme do të zgjedhin vetëm në 13 tetor 2019.
Ndaj ju ftoj të ndiqni dhe këtë video për t’u çtensionuar sadopak në prag të kësaj fundjave interesante.
