Presidenti Ilir Meta vijoi replikat në distancë përmes rrjeteve sociale me kryeministrin Edi Rama, për sa i përket çështjes së pandemisë.
Meta i kërkon kreut të qeverisë që të shtojë testimet, buxhetin në shëndetësi dhe të rimbursojë pacientët që mjekohen në shtëpi.
“Qytetarët e infektuar po shtohen çdo ditë! Jetët e humbura po shtohen çdo ditë! Shto testimet!
Rimburso pacientët të cilët mjekohen në shtëpi, familjet në nevojë dhe pensionistët e infektuar me COVID-19! Rrit buxhetin për sistemin shëndetësor! Shto spitalet COVID! A e di ti sa paguan sot çdo shqiptar për mjekim dhe ilaçe për t’i shpëtuar COVID-19? A nuk ishe ti që ju premtove shëndetësinë falas? Mjaft me koncesione dhe PPP korruptive! Mjaft me tenderë sekrete për oligarkët”, shkruan Meta në Facebook.
Rama: Jeni çetë e çakërdisur personazhesh qesharake me kostume serioze
Kryeministri Edi Rama e ka akuzuar opozitën si një “çetë e çakërdisur personazhesh qesharake me kostume serioze”, pas rasteve të vetëvrasjes së disa personave në spitalet Covid.
Kryeministri merr krahasim Italinë dhe thotë se janë vetëvrarë 71 persona me Covid dhe atje opozita nuk është marrë me këtë tragjedi.
“Në Itali nga Marsi në Gusht janë vetëvrarë 71 persona me Covid dhe s’ka bërë vaki të merret opozita me këto tragjedi, po ju s’jeni opozitë, ju jeni një çetë e çakërdisur personazhesh qesharake me kostume serioze! Do kaloni dhe ju bashkë me Covidin, me dhimbje po do kaloni me dimrin”, tha Rama.
