Presidenti Ilir Meta doli në një konferencë për shtyp pasditen e së hënës për të apeluar për përgjegjësi nga institucionet dhe qytetarët në lidhje me koronavirusin.
“Ftoj qytetarët të përballojnë me përgjegjësi dhe qetësi këtë situatë, të respektojnë me rigorozitet protokollet mjekësore. Nuk ka vend për panik, por nuk ka vend kurrësesi për nënvlerësimin më të vogël nga të gjithë institucionet. Në këtë situatë kërkohet përgjegjësi maksimale. U bëj thirrje të gjitha institucioneve që të marrin masa për sigurimin e mjeteve mbrojtëse të domosdoshme, veçanërisht për mjekët dhe infermierët”, tha Meta.
“Po e ndjek situatën hap pas hapi dhe bashkë me institucionet do të bëjmë çdo gjë për të qenë pranë çdo qytetari dhe për tejkalimin me pasoja sa më të lehta të kësaj situate. Apeloj për plane të detajuara për çdo strukturë, plan veprimi të qartë për strukturat shëndetësore, plan të detajuar ekonomik për veprimet financiare mbështetëse”, theksoi President.
Sipas Metës, “mësimet e nxjerra nga vende të tjera më të zhvilluara janë instrumentet më të sigurta për të përballuar këtë situate”.
