Napoli dhe Club Brugge janë dy skuadrat e radhës që presin biletat e fazës tjetër të UEFA Champions League pas rezultateve pozitive në grupet respektive.
Jo vetëm në Seria A, Napoli po zhvillon një sezon perfekt në Europë me 4 fitore në po kaq ndeshje të grupit A ku kryeson me 12 pikë pas fitores së dytë ndaj Ajax-it brenda një jave.
4-2 u mbyll ndeshja në “Maradona” ku Kvaratskelia, Lozano, Osimhen dhe Raspadori e shtynë skuadrën e kaltër drejt suksesit. Napoli është një nga të paktat skuadrat europiane që nuk ka pësuar ende asnjë humbje këtë sezon ndërsa Ajax me këtë humbje largohet edhe më shumë nga objektivi kualifikim.
Në ndeshjen tjetër, atë të grupit B, Atletico Madrid bëri një hap shumë të madh prapa pasi u ndal në barazim pa gola nga Clube Brugge që konsolidon pozitat në krye të grupit me 10 pikë duke mos regjistruar ende asnjë humbje.
6 pikë më pak për ekipin e Diego Simeones që duhet ta kërkojë kualifikimin në dy ndeshjet e fundit me Bayer Leverkusen dhe Porton. Në katër ndeshje të grupit B, Brugge nuk ka pësuar ende asnjë gol.
