Delegacioni i Parlamentit Europian u shpreh kundër idesë së një qeverie tranzitore, ndërsa i dhanë një mesazh të fortë edhe kryetares së LSI-së, Monika Kryemadhi.
Qeveri legjitime
Në konferencën për shtyp të mbajtur paraditen e kësaj të enjteje në Tiranë, Eurodeputeti Tunne Kelam tha se Shqipëria ka një parlament dhe qeveri legjitime dhe theksoi se fokusi kryesor i politikës shqiptare duhet të jetë përgatitja për Qershorin.
“Ne e kemi diskutuar këtë ide dhe kemi dëgjuar mendimet e ndryshme. Mendimi im është që parlamenti është zgjedhur në mënyrë të ligjshme. Ju keni një qeveri legjitime kështu që mendoj që përqendrimi tek ideja e pasjes së një qeverie të përkohshme, ose kalimtare do të dëmtonte përqendrimin që duhet të keni për hapjen e negociatave. Mendoj që përgatitja për Qershorin do të thotë pajtim dhe unitet kombëtar dhe siç e thashë kjo është puna juaj”, tha Kelam.
Knut Fleckenstein ishte i prerë në qëndrimin e tij: “Në asnjë mënyrë”.
Zgjedhjet
Nga ana e tij, Cristian Dan Preda, i cili në zgjedhjet e 2017-s ishte vëzhgues në vendin tonë, tha se i dukej e çuditshme që pas 1 viti e gjysmë disa politikanë shprehen se ato ishin të këqija.
Në vlerësimin e tij, zgjedhjet në fjalë shkuan mirë.
“Unë jam përfaqësues i PPE-së, bojkoti për ne është i pa pranueshëm, abandonimi i mandateve është i pa pranueshëm për ne. E kemi thënë këtë gjë në fakt edhe kur ishte partia e Ramës ajo që bojkotoi dhe e përsërisim këtë qëndrim edhe sot. Ne jemi parlamentarë dhe kemi përgjegjësitë tona. Unë kam qenë këtu si vëzhgues i zgjedhjeve të 2017-s dhe përfundimet tona ishin se zgjedhjet shkuan mirë. Dhe nuk mund të themi pas 1 viti e gjysmë se zgjedhjet nuk ishin të mira. Dhe kur e dëgjoj këtë gjë nga disa parti dhe kur ata thonë se përfundimet e zyrtarëve europianë nuk janë korrekte, mërzitem pak, sepse ne kemi ekspertizën, përvojën më të mirë në botë, që respektohet në të gjithë botën sa i përket vëzhgimit të zgjedhjeve. Për mua është pak çudi që të dëgjoj politikanë shqiptarë që zgjedhjet në 2017 kanë qenë të këqija, nuk di çfarë do të thotë kjo. Ju lutem respektoni rezultatin e zgjedhjeve”, tha Dan Preda.
Mesazh për Kryemadhin
Raportuesi për Shqipërinë në parlamentin Evropian, Knut Fleckenstein gjatë fjalës së tij në konferencën për shtyp tha se është ndjerë shumë i zhgënjyer nga kryetarja e LSI, Monika Kryemadhi pasi ajo tha se këtu është i nevojshëm ndryshimi i qeverisë, dhe se “nëse ndërkombëtarët nuk e kuptojnë këtë, ky nuk është problemi ynë”.
“Ne e bëmë të qartë, se ne i kuptojmë argumentet e Bashës, por edhe sikur opozita të ketë tërësisht të drejtë për akuzat, bojkotimi i Kuvendit, nuk është zgjidhje e problemit dhe në fund dëshiroj të them që u befasova, u çudita shumë por edhe u zhgënjeva shumë nga kryetarja e LSI-së, pasi ajo tha vetëm një fjali, në fund të takimit, e kanë marrë vendimin që në Shqipëri ka nevojë për ndryshim pushteti për shoqërinë dhe vendin e në rast se evropianët nuk e kuptojnë ky nuk është problemi i tyre, ky është një mesazh i qartë dhe besoj se ata në Bruksel që marrin vendime dhe ata që janë në Shqipëri duhet të kuptojnë se në cilën anë gjendet secili”, u shpreh Fleckenstein.
