Lefter Zhidru, 71-vjeçari që u ekzekutua ditën e djeshme në Elbasan nga forcat RENEA do të varroset në fshatin Xarrë të Sarandës, në vendlindjen e tij. Tvklan.al ka mësuar se familjarët e tij pasi e kanë tërhequr trupin e pajetë të të moshuarit nga morgu janë nisur për të kryer ceremoninë mortore atje.
Kunata e të ndjerit, Sofia Zhidru, ka treguar gjatë një bisede telefonike për Tvklan.al se 71-vjeçari nuk ka qenë polic siç thuhet në media. Ajo thotë se ka qenë një prej djemve të Zhidrut oficer policie në qytetit bregdetar të Sarandës.
Sofia Zhidru: Jo nuk ka qenë polic, djalin e tij e ka pasur polic. Djali ka qenë oficer policie në Sarandë. Ai ka qenë zetorist në fshat në Sarandë. Ka hapur një lokal në Elbasan për vete, punonte për djersën e ballit.
Ajo është shprehur më tej se 71-vjeçari nuk ka pasur asnjë problem shëndetësor.
“Asgjë, asgjë fare”, tha ajo.
Sa i përket armëve dhe sasisë së tritolit, familjarët pretendojnë se ato i ka vënë policia. Për motivet, kunata e Zhidrut thotë se e gjithë ngjarja ka ndodhur për shkak të një përplasje që ka pasur me një prej fqinjëve, për të cilin 71-vjeçari sipas saj ka pretenduar se është mbrojtur politikisht. Zhidru kishte 22 vite që ishte zhvendosur në Elbasan.
Fqinjët për Zhidrun: Problematik edhe në pallat
Ndërkohë banorë të pallatit kanë treguar se në minutat e para ka qëlluar në mënyrë të vazhdueshme, ndërsa janë shprehur së viktima ishte njeri problematik.
Ajo që bie në sy është se pjesa më e madhe e tyre rrëfejnë se Lefteri e keqtrajtonte bashkëshorten.
Një nga fqinjet e familjes shprehet për Abc News: “Shumë problematik ishte. Problematik me njerëzit te pallati. Me të shoqen, ziheshin, griheshin, e zhdëpte gruan në dajak. Shumë i keq. Për gocen nuk e di a ka qenë e dhunuar. Zihej me pallatin të gjithë. E gjet nga e vetja ai. Ta mbajmë mend çfarë kemi heq.”
Kurse një tjetër fqinje, u shpreh se 71-vjeçari përpara se të ngjarja të përshkallëzonte ishte duke bërë sherr me të shoqen.
“Goca bërtiste. Pastaj iku gruaja iku, shkoi në polici.”
Ngjarja
Ditën e djeshme RENEA ekzekutoi Lefter Zhidrun pas 5 orë negociatash. 71-vjeçari qëndronte në banesën e tij dhe hapi zjarr ndaj oficerëve të policisë. Ngjarja nisi rreth orës 13:20, në lagjen “11 Nëntori” në zonën e njohur si “Kthesa e Sarës”, kur 71-vjeçari u konfliktua me bashkëshorten, e cila njoftoi policinë. Pasi mbërriti policia, Zhidru u fut në banesë dhe nisi rezistencën e tij, duke hapur zjarr ndaj efektivëve.
Plumbat lanë të plagosur edhe dy të rinj, kalimtarë të rastit, fatmirësisht pa probleme për jetën. Për orë me radhë, policia u përpoq të negocionte me 71-vjeçarin që të dorëzohej, por pa sukses. Aksioni i RENEA-s për të ndërhyrë brenda banesës së ndodhi orës 18:00. 71-vjeçari qëlloi me armë gjatë këtij momenti, ndërsa RENEA u kundërpërgjigj.
Nga shkëmbimi i zjarrit mbeti i vrarë Lefter Zhidru. Brenda banesës së 71-vjeçarit, RENEA gjeti sasi të konsiderueshme municioni luftarak dhe disa kallëpe tritol të lidhura me fitil zjarrpërcjellës.
