Para nisjes së ndeshjes Tirana-Laçi, futbollistët e të dy skuadrave kanë mbajtur nga një minutë heshtje për nder të Ali Memës, ish-lojtarit dhe trajnerit të skuadrës bardheblu, të ndarë nga jeta pak ditë më parë.
Legjenda e klubit është nderuar edhe nga grupimi i tifozëve “Tirona Fanatics” të cilët kishin përgatitur një parullë më një mesazh teoër domethënës.
“Kur ti jeton akoma në zemrën e familjes, kujtimin e tifozëve dhe shpirtin e kryeqytetit, vdekja nuk është fundi”, shkruhej në banderolën e hapur nga tifozët.
Ali Mema u nda nga jeta të martën e 26 marsit në moshën 76-vjeçare. Ikona e klubit të Tiranës humbi betejën me një sëmundje të rëndë, duke lënë pas vetes një trashëgimi të madhe në sportin shqiptar, e mbi të gjitha në skuadrën bardheblu.
Ali Mema e kaloi pjesën më të madhe të karrierës me Tiranën, ndërsa ka luajtur edhe me Vllazninë dhe një sezon me Partizanin, teksa regjistroi edhe 14 ndeshje me Kombëtaren.
