Ish-kryeministri Sali Berisha ka mohuar njohjen me Agron Nezën, ish-agjentin e shërbimeve sekrete që është nën hetim nga drejtësia amerikane për dhënien e një shume parash prej 225 mijë dollarësh ndaj ish-zyrtarit të FBI-së, Charles McGonigal.
Berisha tha se njeh shumë familjarë të Agron Nezës, por atë personalisht jo. Foton e publikuar mes të dyve ditën e djeshme, Berisha zgjodhi ta komentonte duke thënë se ai nuk njeh çdo person që mund të dal një foto me të.
“Revolucion nënkuptoj largimin e kësaj kalbësire nga skena politike dhe rikthimin e votës së lirë në këtë vend.
Agron Nezën se ka një fotografi me mua, por mund të jenë 100 mijë shqiptarë që mund të kenë fotografi me mua, por nuk i njoh të gjithë.
Kam njohur shumë familjarë të tij, por këtë nuk e kam njohur. Ai do bëjë çdo deklaratë që të lehtësojë veten se nuk mund të rëndojë pozitën e tij se është nën hetim. Kjo është afër mendsh”, tha Berisha.
Në lidhje me marrjen në pyetje të djalit të tij Shkëlzen Berisha, si person që ka dijeni për çështjen Gërdeci, Berisha tha se është një përpjekje e maxhorancës për të errësuar aferën Rama-Mcgonigal.
“Përpjekje për të errësuar aferën Rama-McGonigal me instrumentalizimin e SKAP-it të partisë”, tha Berisha.
