Deputetët Oriela Nebiaj dhe Flamur Hoxha kanë dhënë dorëheqjen nga kryesia e Partisë Demokratike pas mbledhjes që u zhvillua mbrëmjen e djeshme, e cila zgjati rreth 10 orë.
Hoxha ka dhënë dorëheqjen dhe nga posti i sekretarit organizativ.
Pas këtij vendimi, Hoxha me nota ironie ka deklaruar se nuk është në nivelin e asaj kryesie.
“Dorëheqjen si sekretar organizativ rrjedhimisht dorëheqje nga kryesia si anëtar kryesie nga posti o sekretarit organizativ pasi nuk jam në lartësinë e asaj kryesie”, ka deklaruar Hoxha.
Më herët edhe Jorida Tabaku dha dorëheqjen nga posti i nënkryetares së PD-së.
Kryesia e Partisë Demokratike zhvilloi dje një mbledhje për të diskutuar rreth mënyrës se si do të drejtohej partia dhe për datën e caktimit të zgjedhjes së kryetarit të ri të saj. Mbledhja u shoqërua me debate dhe tensione të shumta.
Disa deputetë u larguan duke e konsideruar vendim të njëanshëm përcaktimin e një date për zgjedhjen e kryetarit të ri të PD.
Kryesia vendosi hapjen e procesit zgjedhor dhe mbajtjen e zgjedhjeve për Kryetarin e PD me datë 29 korrik 2023. Vendimi u miratua me 17 vota pro, Jonila Godole dhe Flamur Hoxha votuan kundër ndërsa, Jorida Tabaku, Juela Hamati dhe Oriela Nebiaj abstenuan.
