Sekretari i Përgjithshëm i Partisë Demokratike, Gazment Bardhi, duke folur në televizionin “A2 CNN″ ka deklaruar se PD nuk do ta njohë garën për Prokurorin e Përgjithshme, pasi sipas tij trupa e KLP-së nuk plotëson kriteret ligjore.
Sipas tij, kryetari i KLP-së, Gent Ibrahimi është “eksponent shumë i afërt i Partisë Socialiste”. Më tej, kujton se si Ibrahimi dhe vetë Bardhi kanë përfaqësuar dy partitë më të mëdha në vend, përkatësisht PS dhe PD, në komisionin e reformës ne drejtësi.
“Nuk ka rëndësi kush do të jetë Prokurori i ri i Përgjithshëm, kur e gjithë trupa që do të kryesojë procesin për Prokuror të Përgjithshëm është konsideruar një trupë me anëtarë që nuk plotësojnë kriteret ligjore. E gjithë kjo vendos në pikëpyetje procesin dhe vendimmarrjen.
Duke nisur nga Kryetari i KLP. Ai është cilësuar nga ONM si një kandidaturë që nuk duhet të përfshihej në garë për të qenë anëtar i KLP, sepse nuk plotëson kriteret kushtetuese dhe ligjore. Nuk po i hyj fare lidhjeve me Partinë Socialiste. Ju e mbani mend që ka qenë përfaqësues i qeverisë në Komisionin e Reformës në Drejtësi. Unë, bashkë me disa kolegë ishim përfaqësues te PD, zoti Ibrahimi, me disa kolegë të tij ishin përfaqësues të qeverisë apo PS”, tha Bardhi.
