Nga Gordon Corera – Korrespodent për çështjet e sigurisë në BBC News
Planet fillestare politike të Rusisë për Ukrainën duket se kanë shkuar keq, ashtu si edhe planet e ushtrisë së saj.
Megjithatë, ky dështim po ngre frikën se çfarë taktikash mund të kërkojnë të përdorin tani rusët, pasi zyrtarët e inteligjencës europiane paralajmërojnë për taktika më represive.
Gjatë një periudhe vitesh, shërbimi rus i sigurisë, FSB është përpjekur të rekrutojë rrjete agjentësh në të gjithë Ukrainën, të cilët mund të aktivizoheshin kur të fillonte një pushtim. Ata parashikoheshin të merrnin institucionet kryesore.
Por shpresat për një lloj grusht shteti të shpejtë janë zbehur. Kjo mund të ketë qenë për shkak të parashikimeve tepër optimiste për madhësinë dhe aftësinë e rrjeteve të fshehta dhe dështimin për të vlerësuar shkallën e rezistencës ukrainase.
Kjo e ka bërë Moskën të ripërpunojë planet e saj politike dhe ushtarake.
FSB do të jetë përgjegjëse për marrjen e pushtetit politik në qytetet ukrainase pasi ushtria t’i ketë pushtuar ato.
Zyrtarët e inteligjencës europiane kanë paralajmëruar për strategjitë që Rusia mund të përdorë teksa kërkon të shuajë rezistencën në çdo qytet që pushton.
“Zyrtarët rusë kanë konsideruar masa agresive për të shtypur protestat dhe rezistencën e mundshme”, tha një burim për BBC.
“Këto masa kanë përfshirë kontrollin e dhunshëm të turmave, ndalimin represiv të organizatorëve të protestave dhe ndoshta ekzekutime publike për të penguar protestuesit ukrainas”.
