Nuk ndalet ”vrapi” i kuotimit të arit në tregjet aziatike, në valën e pasigurive për ecurinë e ekonomisë botërore. Lingota ka arritur në kuotën 2 mijë e 22 dollarë për onc. Në një vit, çmimi i arit është rritur me 33 %.
Investitorët kanë lëvizur paratë e tyre në metale të çmuara, ndërsa rastet e infektimeve me COVID-19 po rriten në SHBA e kur shumë para po injektohen në ekonominë globale.
Rekordi i ri i çmimit të arit, sipas BBC, është ndikuar edhe nga rritja e tensioneve mes Pekinit dhe Uashingtonit.
Çmimet e metaleve të tjera të çmuara si argjendi janë rritur gjithashtu ndjeshëm që nga nisja e vitit.
Mes arsyeve për këto rritje janë edhe ato se investitorët po e përgatisin veten për një rritje të inflacionit si rrjedhojë e ndikimit që do të ketë stimujt monetarë që do të ndërmarrin qeveritë dhe bankat qendrore në botë.
Ekspertët parashikojnë se rritja e çmimit të arit do të vijojë edhe më tej. Peter McGuire nga XM.com është shprehur se ai e sheh arin të arrijë në nivelin 2,200 dollarë deri për Krishtlindje. Po ashtu, ai parashikon rritje të metaleve të tjera të çmuara si argjendi, platini dhe paladiumi.
