Kryeministri Edi Rama deklaroi pasditen e sotme se nuk pati më motiv për ta vazhduar gjyqin me gazetarin e “Bild” pas njohjes me shefat editorialistë të kësaj gazete në Konferencën e Sigurisë në Mynih.
Sqarimin kreu i qeverisë thotë se e bën për popullin dhe jo për kundërshtarët politikë.
“Në greqishten e vjetër ‘idiot’ quhej personi që s’duhet të merrej me çështje të interesit publik, po vetëm me punët e veta. Fatkeqësisht më kanë qëlluar kundërshtarë disa që politikën e kanë si nevojë personale dhe jashtë nxjerrin papushim në publik idiotësinë e tyre”, u shpreh Rama në reagimin e tij.
“Por paçka se fatmirësisht ky popull ua njeh erën prej kohësh dhe as u afrohet më, sqarimet duhen bërë për popullin, jo për ta! U njoha me shefat editorialistë të BILD gjatë Konferencës së Sigurisë në Mynih dhe kaluam aq bukur, sa nuk pata më motiv për ta vazhduar gjyqin. Njerëzore!” – thotë Rama.
Kryeministri Rama lajmëroi në Qershor të 2019-s nisjen e procedurave për t’u përballur në gjykatat gjermane me gazetën Bild. Kryeministri ngriti një padi ndaj gazetës pasi ajo publikoi disa nga përgjimet e dosjeve 339 dhe 184.
