Mbreti meksikan i drogës, Joaquin Guzman i njohur si El Chapo, u shpall fajtor nga një gjykatë në SHBA pas 12 javëve seanca dëgjimore.
El Chapo u shpall fajtor për mbi 10 akuza që rëndonin mbi të, përfshirë trafikun e drogës dhe pastrimin e parave.
Vendimi përfundimtar pritet të konfirmohet më 25 qershor, por një gjë është e sigurt; bosi i kartelit Sinaloa do ta kalojë pjesën tjetër të jetës në burgun e sigurisë së lartë “ADX Florence” në Kolorado, nga i cili deri më sot asnjë i burgosur nuk ka arritur të arratiset.
Megjithatë, ajo çfarë i intereson shumë opinionit: Ku janë paratë e “mbretit” të drogës?
Bëhet fjalë për jo pak, por plot 14 miliardë dollarë. Në aktakuzën e ngritur në vitin 2016, thuhet se pas gjykimit, SHBA-të do të fillojnë kërkimet në pronat e tij për t’i gjetur 14 miliardë dollarët e fshehura.
Megjithatë, nuk dihet se si prokurorët kanë arritur të sigurojnë shifrën e saktë të parave, kuptohet nëse ato tashmë ekzistojnë diku të fshehura.
“Bëhet fjalë 14 miliardë dollarët e fituara nga trafikimi i drogës, por prokurorët amerikane asnjëherë nuk e kanë sqaruar se si janë grumbulluar këto para”, ka deklaruar Duncan Levin, ish-ndihmës prokurori amerikan që ishte fokusuar në pastrimin e parave dhe pronave të paluajtshme.
Sipas Levinig, El Chapo kishte “fituar një shumë të majme parash nga aktivitetet e paligjshme dhe sigurisht se ekziston një shumë e tillë e parave”, por nuk dihet nëse do të mund të arrijnë ta dëshmojnë këtë.
Megjithatë, ai pretendon se pjesa e madhe e këtyre parave cash janë shpenzuar.
“Nuk besoj që El Chapo i ka 14 miliardë dollarë, edhe pse karteli Sinaloa ka fituar shumë para. Megjithatë ata kanë pasur edhe shpenzime”, ka deklaruar Mike Vigil, duke nënvizuar listën e mijëra personave që paguheshin për të kryer punë të ndryshme siç janë sigurimi i aeroplanëve, veturave, kamionëve, nëndetëseve dhe tuneleve nëntokësorë për trafikim.
Një shumë e majme e parave sigurisht se janë dërguar në SHBA, por një pjesë tjetër e madhe është dërguar tek bashkëpunëtorët e Guzmanit në Meksikë.
“Shumica e njerëzve siç është El Chapo dhe trafikantët e tjerë të drogës, kryesisht investojnë shumë para në prona të paluajtshme”, ka shtuar Vigil.
Ish-anëtari i kartelit që ka dëshmuar kundër Guzmanit, ka deklaruar se ai përveç aeroplanëve privatë e jahteve, kishte blerë shtëpi në çdo plazh të Meksikës.
“Në shtëpinë e tij në plazhin e bukur të Akapulkos, Guzman kishte kopësht zoologjik privat me një tren të vogël me të cilin udhëtonte për të parë luanët, tigrat dhe panterat”, ka deklaruar ky dëshmitar.
Por, ekzistojnë edhe investime më praktike siç janë fermat dhe pronat e paluajtshme që ndihmojnë në pastrimin e parave të pista.
“Në afërsi të Sinaloas, Kulijakan, kanë ferma madje edhe kopshte për fëmijë brenda të cilave zhvillohen aktivitete kriminale”, ka shtuar Vigil.
Narko-bosi gjithashtu financonte kishat, ekipet e futbollit dhe organizata bamirëse me qëllim që të gëzojë reputacionin e një filantropi.
Por pasi ra në duart të policisë, shumë persona janë ndjerë të dëshpëruar për faktin se kanë humbur financuesin kryesor.
Në vitin 2017, kryeprokurori meksikan ka deklaruar se vendi i tij ka arritur të zbulojë një pronë të paluajtshme që i përket Guzmanit, kurse SHBA-të nuk kanë arritur ta gjejnë “as edhe një dollar” pasi Guzman nuk e ka përdorur “sistemin financiar”.
Departamenti i trezorit gjatë vitit 2014 kishte publikuar listën e 288 kompanive, që në vitin 2007 i kishte futur në listën e zezë për pastrim parash dhe që kishin lidhje me Guzmanin.
“Ekzistojnë pretendime që qeveria meksikane ka marrë rryfshet. Megjithatë mbetet të shihet se sa bashkëpunues do të jenë në tentimin për të gjetur pronat e paluajtshme”, ka shtuar Levin.
Disa ditë më parë filluan të qarkullojnë edhe disa propozime, që paratë e konfiskuara të El Chapos të përdoren për ndërtimin e murit SHBA-Meksikë.
Senatori i Teksasit, Ted Cruz, ka premtuar se do miratojë një ligj që do të lejonte që paratë e El Chapos të përdoren për siguri kufitare.
