Varianti i Afrikës së Jugut i shpëton mbrojtjes që siguron vaksina Pfizer-BioNTech. Një studim i kryer në Izrael, një nga vendet lider në fushatën e vaksinimit, pothuajse plotësisht me Pfizer, arriti në përfundimin se prevalenca e variantit të Afrikës së Jugut (B.1.351) midis pacientëve që morën dy doza të vaksinës ishte afërsisht tetë herë më e lartë se në popullatën e pavaksinuar. Edhe pse numri i pacientëve të marrë në shqyrtim është i kufizuar, rezultati konsiderohet tregues.
Studimi
Studimi është kryer nga Universiteti i Tel Aviv dhe Instituti Clalit. Studiuesit mbajtën nën vëzhguan gati 400 njerëz që rezultuan pozitiv për Covid-19 pasi morën të paktën një dozë të vaksinës dhe i krahasuan ato me të njëjtin numër të njerëzve të infektuar dhe të pavaksinuar.
“Varianti i Afrikës së Jugut, krahasuar me llojin origjinal dhe variantin anglez, ia del të kompromentojë imunitetin që jep vaksina”, thotë profesori Ran Balicer, drejtor kërkimi në Clalit.
Ky studim ngre pikëpyetje në lidhje me një tjetër studim të mëparshëm të vetë Pfizer, sipas të cilit vaksina mARN gjeneron imunitet për të paktën gjashtë muaj edhe ndaj variantit të Afrikës së Jugut.
Hulumtimi i ri në Tel Aviv duket se konfirmon një studim të fundit nga Universiteti Be-Gurion i Negev, i cili zbuloi se vaksina është më pak efektive kundër variantit të Afrikës së Jugut
Studimi i dozës së tretë
Përhapja e varianteve (në veçanti Afrikës së Jugut dhe Brazilit, të cilat kanë mutacionin E484K të përbashkët, të aftë për të shmangur pjesërisht mbrojtjen e vaksinës, po shqetëson qeveritë në të gjithë botën. Aq sa kompanitë farmaceutike tashmë po studiojnë një “dozë të tretë” pikërisht për të rritur mbrojtjen ndaj varianteve më agresive.
Pfizer-BioNTech po teston një dozë të tretë të vaksinës së tyre Covid-19 për të kuptuar më mirë përgjigjen imune ndaj varianteve të reja të virusit. Moderna gjithashtu ka zhvilluar një vaksinë kundër variantit të Afrikës së Jugut dhe i dorëzoi dozat në Institutin Kombëtar të Shëndetit të ShBA për fillimin e testeve klinike. Përditësimi i vaksinës me teknologjinë mARN është më i shpejtë dhe më e lehtë se ai për vaksinat vektoriale.
