Zvonimir Boban mund të konsiderohet tashmë një ish-drejtues i Milanit, sepse pas takimit të djeshëm me Administratorin e Deleguar Ivan Gazidis, është vendosur për largimin e tij, ndërsa mbetet të përcaktohen vetë afatet e zgjidhjes së bashkëpunimit.
Kjo pasi kroati ishte pozicionuar disa herë kundër Gazidis dhe planeve të tij te Milani, gjëra këto që nuk i kanë pëlqyer aspak ish-drejtuesit të Arsenalit, i cili gëzon mbështetjen e plotë të pronarëve të kubit kuqezi, Fondit Amerikan Elliot.
Përveç Zvonimir Bobanit, në verë mund të largohen edhe dyshja tjetër Maldini-Massara, pasi edhe këta të fundit janë kundër idesë së Gazidis për të sjellë në krye të pankinës së Milanit ish trajnerin e Leipzig, gjermanin Ralf Rangnick.
Ky i fundit është i preferuari i Gazidis dhe sipas raportimeve të mediave, ka nënshkruar një parakontratë për të ardhur në verë te Milani me rolin e dyfishtë, atë të trajnerit dhe atë të drejtorit sportive.
Ndërkohë situate e krijuar në nivelet drejtuese ka ndikuar drejtpërdrejtë te skuadra, pasi zërat pranë klubit kuqezi raportojnë se Stefano Pioli po mendon të japë dorëheqjen nga stoli i Milanit menjëherë pas përfundimit të ndeshjes së Kupës së Italisë ndaj Juventusit, në plan të mërkurën në mbrëmje.
Kjo pasi Pioli ka kuptuar se e ardhmja e tij nuk do të jetë në stolin kuqezi dhe ashtu siç veproi një vit më parë te Fiorentina, është gati të bëjë të njëjtën gjë edhe te Milani, duke u larguar para se ta shkarkojnë.
Për të qetësuar disi situatën në prag të transfertës ndaj Juventusit, sot në Milanello kanë shkuar Maldini e Boban, të cilët kanë kërkuar që lojtarët të përqendrohen vetëm te ato që ndodhin në fushë dhe të mos mendojnë aspak për ndryshimet në nivelet drejtuese.
Kujtojmë që Milani dhe Juventusi u ndanë në barazim 1-1 në sfidën e parë në “San Siro” dhe nesër në mbrëmje kuqezinjtë do ta kenë shumë të vështirë, pasi do të duhet të bëjnë llogaritë edhe me mungesat e Ibrës, Theo Hernandez dhe Castillejos, të cilët janë të skualifikuar.
