Ish-kryeministri grek Alexis Tsipras ka kritikuar qeverinë Mitsotakis për masat e marra për pandeminë, kryesisht për paketën financiare, ndërsa ka zhvlerësuar rregullat e vendosura prej saj për karantinën.
Në një intervistë për televizionin ‘Kontra Channel’, i pyetur për kufizimet e vendosura nga qeveria ai mori qeverinë shqiptare si shembull, duke thënë se si pasojë e shtrëngimeve Shqipëria ka një numër të ulët viktimash.
“Ne si opozitë qëndruam me përgjegjësi në këtë situatë, sepse gabime janë bërë, por nuk i përdorëm për të bërë opozitë. Por nuk mund të pranojmë që qeveria të shkojë ne ekstremin tjetër dhe të thotë që gjithçka e ka bërë shumë mirë. Sepse nëse thotë se është qeveria më e mirë në botë atëherë, çfarë duhet të thonë fqinjët tanë? I bie që zoti Rama që ka vetëm 25 vdekje është Perëndi”.
Tsipras tha se opozita e drejtuar prej tij nuk po përpiqet të përfitojë politikisht në këtë situatë, pasi në një kohë krize është e gabuar të bësh llogari politike.
Por kritikat më të forta ai i pati për paketën ekonomike. Ai tha se nëse qeveria nuk merr masat e duhura, atëherë Greqia do të ketë një recesion të thellë, sipas parashikimeve të FMN me një rritje ekonomike minus 10 përqind.
