Gara për arritjen e një vaksine kundër pandemisë së koronavirusit ka hyrë në fazën e saj më të ethshme. Pas deklaratës së Pfizer, një tjetër kompani ka gati një vaksinë kundër virusit vdekjeprurës.
Kompania amerikane Moderna njoftoi të hënën se vaksina e saj eksperimentale është 94.5% efektive për të parandaluar Covid-19 pas të dhënave të marra nga testimet klinike që po kryen në shkallë të gjerë.
Gjetjet e vaksinës janë të ngjashme me ato të kompanisë Pfizer dhe shtojnë besimin në rritje se vaksinat mund të ndihmojnë në përfundimin e pandemisë.
Të dy kompanitë përdorën një qasje shumë inovative dhe eksperimentale për të hartuar vaksinat e tyre.
Kompania ”Moderna” deklaroi se është një “ditë e madhe” dhe planifikon të aplikojë për miratim për të përdorur vaksinën në javët e ardhshme.
Sa është e suksesshme?
Eksperimentimet përfshinë 30 000 persona në SHBA, gjysmës së të cilëve iu dhanë dy doza të vaksinës, me katër javë diferencë. Analiza u bazua tek 95 pacientët e parë që zhvilluan simptoma Covid-19.
Kompania deklaroi se ”vaksina e saj mbron 94,5%”. Të dhënat gjithashtu tregojnë se kishte 11 raste të rënda Covid-19, por asnjë nuk ndodhi tek njerëzit e imunizuar.
“Efektiviteti i përgjithshëm ka qenë i jashtëzakonshëm… është një ditë e mrekullueshme”, theksoi zyrtari kryesor i ”Moderna”-s, Tal Zaks.
Është e sigurt?
Asnjë shqetësim i rëndësishëm i sigurisë nuk është raportuar, por asgjë, përfshirë acetaminofenin nuk është 100% e sigurt.
Lodhjet, dhimbjet e kokës dhe dhimbje të lehta janë raportuar në disa pacientë pas injeksionit.
“Këto efekte janë ato që ne do të prisnim nga një vaksinë që funksionon dhe nxit një përgjigje të mirë imune”, tha profesor Peter Openshaw, nga ”Imperial College London”.
Si krahasohet me vaksinën Pfizer?
Të dy vaksinat përdorin të njëjtën qasje të injektimit të një pjese të kodit gjenetik të virusit për të provokuar një përgjigje imune.
Të dhënat paraprake që kemi parë deri më tani janë shumë të ngjashme: rreth 90% mbrojtje për vaksinën Pfizer/BioNTech dhe rreth 95% për ”Moderna”-n. Sidoqoftë, të dyja vaksinat janë ende në vazhdim dhe numrat përfundimtarë mund të ndryshojnë.
Vaksina e ”Moderna”-s duket se ruhet më lehtë pasi mbetet e qëndrueshme në minus 20°C deri në gjashtë muaj dhe mund të ruhet në një frigorifer standard shtëpie për një muaj dhe në temperatura ambienti deri në 12 orë.
Vaksina e Pfizer kërkon ruajtje ultra të ftohtë në afërsisht minus 75°C, por mund të ruhet në frigorifer për pesë ditë.
Kur do ta nisë prodhimi?
Kompania ”Moderna” thotë se ajo do të zhvillohet për SHBA në javët e ardhshme. Pritet të ketë 20 milionë doza në dispozicion në vend.
Kompania shpreson të ketë deri në një miliard doza në dispozicion për përdorim në të gjithë botën vitin e ardhshëm dhe planifikon të kërkojë miratim edhe në vendet e tjera.
Si funksionon?
Moderna ka zhvilluar një “vaksinë ARN”, që do të thotë që një pjesë e kodit gjenetik të koronavirusit injektohet në trup.
Kjo fillon prodhimin e proteinave virale, por jo të gjithë virusin, e cila është e mjaftueshme për të trajnuar sistemin imunitar.
Supozohet se do të trajnojë trupin për të zhvilluar antitrupa dhe një pjesë tjetër të sistemit imunitar të quajtur qelizat T për të luftuar koronavirusin.
Të dyja këto vaksina përfaqësojnë një armë të re në luftën kundër pandemisë së koronavirusit që ka infektuar mbi 54 milionë persona në të gjithë botën dhe iu ka marrë jetën 1.3 milionë prej tyre.
