Në fund të konferencës ë përbashkët për shtyp me kryeministrin Edi Rama, kreu i qeverisë së Kosovës Albin Kurti zbuloi 90 minutat e takimit me homologun shqiptar. Duke e cilësuar këtë një njoftim të rëndësishëm Kurti tha se në një orë e gjysmë takim mes dy delegacioneve nuk u përmend asnjëherë Serbia përveç Kosovës dhe Shqipërisë dhe zhvillimit të dy vendeve.
“Një njoftim të rëndësishëm: Gjatë takimit tonë rreth një orë e gjysmë ku kryeministri Rama ka ardhur me gjysmën e Këshillit të tij të Ministrave, më shumë kanë diskutuar ministrat tanë sesa ne të dy dhe gjithçka ka qenë më qasje zhvillimore. Për një orë e gjysmë nuk është përmendur fjala Ballkan dhe as Serbi, por veç Kosovë dhe Shqipëri dhe mos të krijohet përshtypja se ne kur takohemi vetëm flasim për politikë ndërkombëtare, por kemi shumë punë për të bërë në aspektin e ekonomisë, tregtisë, infrastrukturës por u përgjigjemi çdo pyetjeje”, tha Kurti.
Ndërsa mbledhja e ardhshme mes dy qeverive, asaj të Shqipërisë dhe të Kosovës pritet të zhvillohet javën e fundit të nëntorit në Durrës. Lajmin e dhanë dy kryeministrat, Edi Rama dhe Albin Kurti në konferencën e përbashkët për shtyp, pas takimit që patën.
Po ashtu, kryeministrat thanë se ishin dakordësuar për një Sekretariat Koordinues, i cili do të udhëhiqet nga Gentian Sala, që ka dy pasaporta, atë të Shqipërisë dhe Kosovës.
“Ramë dakord që në javën e fundit të Nëntorit do të mbajmë mbledhjen e përbashkët të qeverive në Durrës”, tha Rama.
“Biseduam edhe për mbledhjen e përbashkët të të dy qeverive. U dakordësuam edhe për një Sekretariat Koordinues, i cili do të udhëhiqet nga Gentian Sala, i cili ka dy pasaporta, atë të Shqipërisë dhe Kosovës“, shtoi Kurti.
