Olsi Bykyku dhe kolegu i tij Lorenc Hasrama kanë qenë të ftuarit e radhës në “Bukë me vete”, programi më i ri që drejtohet nga Roza Lati. Në një puntatë shumë argëtuese dhe me të qeshura siç vetëm Olsi di të dhurojë, u zbuluan edhe disa detaje të reja për raportin romantik të tij me të dashurën.
Moderatorja e pyeti përse vajza në fjalë e shoqëron gjithkund dhe përgjigjja e Olsit nuk mund të ishte më e ëmbël se kaq. “Ajo është mbështetja ime më e madhe, është asistentja ime, më ndihmon me të gjitha projektet”, u shpreh ai. Por miku i tij nuk e la me kaq, pasi zbuloi se pjesët më të bukura të teksteve të këngëve që ka realizuar Olsi janë shkruar nga partnerja e tij.
Siç duket, bukuroshja brune qenka e talentuar në fushën e krijimit, një detaj i përbashkët me partnerin e saj. Kujtojmë se prej muajsh, lidhja e aktorit të njohur me vajzën që quhet Egla u bë qendra e shkrimeve në media, ndërsa tani lidhja nuk është më edhe aq private, pasi dy të rinjtë publikojnë shpesh foto krah njëri-tjetrit. 21-vjeçari, ish-aktor i “Portokallisë”, brenda një kohe të shkurtër u shndërrua në një showman i vërtetë.
Në pak vite fama e tij arriti majat, duke kaluar nga skena e humorit te skena e festivalit “Kënga Magjike”, nga studioja televizive te skenat e klipeve me Lorenc Hasramën e Eni Koçin. Vendimin për të kaluar në “Klan” e mori bashkë me Erion Isain e Bes Kallakun, pas një propozimi që iu bë nga Ardit Gjebrea.
Në programin e “E diela shqiptare”, tre djemtë e humorit kanë rubrikën e tyre “Be Caffe”, ku një nga situatat më të ndjekura ishte përballja e Olsit në rolin e beqarit me Besin në rolin e të martuarit. Olsi rendit të gjitha të mirat e jetës pa grua, ndërkohë që nuk lë pa përmendur edhe rastet kur del për njohje të reja.
Por duket se në jetën reale ai nuk është aspak “single”. Këtë vit, paparazzi e ka fotografuar disa herë me të dashurën e tij, një vajzë simpatike e panjohur në publik, rreth të 20-ve. Edhe pse ai është i rrethuar nga vajzat e televizionit, që bien në sy për ndërhyrjet e shumta estetike, për partneret e tij Olsi u kuptua që ka shije shumë tradicionale. Siç shihet nga fotot, ai ka zgjedhur të ketë në krah një vajzë shumë të thjeshtë dhe larg imazhit të sofistikuar që nuk i dallon vajzat sot nga njëra-tjetra.
Ajo duket e thjeshtë dhe shumë sportive, po njëkohësisht mjaft fine dhe sensuale. Ashtu si te premiera e filmit “Dy gisht mjaltë”, Olsi kujdesej që ta mbante për dore të dashurën, duke mos lënë vend për hamendësime, pra, duke u vetëdeklaruar tashmë si i lidhur. Edhe pse famën e provoi shumë i ri, duket se në çështjet e ndjenjave Olsi është stabël dhe serioz, përshtypje që e ka dhënë edhe në tekstin e këngës “Si të flas”, vargjet e ndjera të së cilës i ka shkruar vetë.
Aktori që dukej se luante vetveten në “Portokalli” me rolin e adoleshentit problematik, i cili e kishte lidhur jetën me idhujt e tij në muzikë, nuk vonoi shumë dhe i hyri muzikës hiphop, duke i konkurruar ata që i përmendte në show çdo të diel. Në vitin 2017, me rap-in e tij ai shfaqi talentin me tekstet plot humor, ku trajtonte edhe tema të mprehta të aktualitetit. Ishte korriku i 2017-s, kur ai shkroi tekstin e kënngës “Kisha menu” për Lorenc Hasramën. Në mars 2018, Olsi publikoi videoklipin “Kush Jam”, ndërsa në qershor 2018 u shfaq në duet me Petro Xhorin në videoklipin “1 Gotë Dashni”.
Në tetor 2018 mori pjesë në “Kënga Magjike 2018” me këngën “Si të flas”, në bashkëpunim me Lorenc Hasramën, duet që u pasua nga klipi “Opium”, me muzikë të Gent Myftaraj dhe të tjera këngë. Në mars të këtij viti u shfaq në një klip me Eni Koçin, me titull “Afër teje”, ku ra në sy me skenat e forta të humorit. Para pak kohësh, Olsi u shfaq çift në një projekt me ish-lojtaren e “Big Brother”, Xheni Mhillaj, ndërkohë na mbetet të shohim nëse edhe të dashurën do ta bëjë pjesë të artit.
Panorama Plus
