Bullgaria dhe Greqia nisën të shtunën shfrytëzimin e një tubacioni gazi, i cili do të ndihmojë në uljen e varësisë së Evropës Juglindore nga gazi rus dhe në rritjen e sigurisë energjitike.
Tubacioni 182 kilometra i gjatë, do të sigurojë lehtësim për Bullgarinë e cila që nga fundi i muajit prillit, ka hasur në vështirësi të sigurojë gaz me çmim të përballueshëm, kohë kur kompania ruse Gazprom ndërpreu furnizimin për shkak të refuzimit të Sofjes për të paguar në rubla (monedha ruse).
Rusia reduktoi furnizimin me gaz të Evropës pasi Perëndimi vendosi sanksione ndaj Moskës për sulmin në Ukrainë, duke i lënë vendet e Bashkimit Evropian në vështirësi për të siguruar burime alternative furnizimi mes çmimeve në rritje.
“Ky tubacion shënon një moment të rëndësishëm për Bullgarinë dhe për sigurinë energjetike të Evropës. Do të thotë liri, liri nga varësia prej gazit rus”, tha presidentja e Komisionit Evropian Ursula von der Leyen gjatë një ceremonie inaugurimi në Sofje, ku morën pjesë udhëheqës nga Bullgaria, Greqia, Azerbajxhani, Rumania, Serbia dhe Maqedonisë së Veriut.
“Si këtu në Bullgari ashtu edhe në të gjithë Evropën njerëzit po ndjejnë pasojat e luftës së Rusisë. Por falë projekteve si ky, Evropa do të ketë mjaftueshëm gaz për dimër”, tha ajo.
Tubacioni Greqi-Bullgari (IGB) do të sigurojë transportin e një sasie prej 1 miliard metër kub gazi nga Azerbajxhani në Bullgari.
Tubacioni mund të sigurojë gaz për Serbinë, Maqedoninë e Veriut, Rumaninë dhe më tej, Moldavinë dhe Ukrainën.
Ai do të transportojë gaz nga qyteti verior grek i Komotinit në Stara Zagora të Bullgarisë. Gazsjellësi është i lidhur me një tjetër tubacion, pjesë e korridorit jugor të gazit që transporton gaz nga Azerbajxhani në Evropë.
