Presidenti Xi Jinping siguroi sot në telefon homologun e tij amerikan, Donald Trump, se vendi i tij është plotësisht i aftë të frenojë epideminë e koronavirusit, sipas medieve publike.
Ai tha se Kina ka filluar një luftë popullore kundër epidemisë duke vënë në zbatim një mobilizim kombëtar dhe masat më të rrepta të parandalimit dhe kontrollit.
Sipas agjencisë së lajmeve “Kina e Re”, Xi Jinping i bëri thirrje, gjithashtu, SHBA-së që të reagojë në mënyrë të arsyeshme ndaj epidemisë, e cila ka infektuar më shumë se 31 000 persona dhe ka shkaktuar 636 viktima, sipas një raporti të fundit të botuar sot.
Uashingtoni ka ndaluar hyrjen në territorin amerikan të të gjithë të huajve jorezidentë, që vijnë nga Kina dhe u ka rekomanduar shtetasve të tij që të mos shkojnë në vendin aziatik ose të mos e lënë atë nëse janë aty.
Pekini ndërmori masa të jashtëzakonshme më 23 janar, duke vënë në karantinë qytetin Wuhan prej 11 milionë banorësh.
