Si ta kuptosh që je e dashura numër 2 për të
Më në fund ke takuar burrin ose të dashurin e ëndrrave të tua. Ti je shumë entuziaste për këtë njohje të re dhe kështu duket se është edhe ai. Por…papritur të pushton ndjesia se po të merr nëpër këmbë. Mos ndoshta për të ti je veçse një histori për të thyer monotoninë? Sepse parandjenja që ti je e dashura numër dy nuk të lë rehat. Më poshtë janë disa këshilla për ta kuptuar këtë gjë në kohë pa i dhënë mundësi “princit të kaltër” të shijojë dy princesha. Lexo me vëmendje disa nga shenjat që e tregojnë diçka të tillë.
1. Ai nuk të fton kurrë për darkë në një restorant pranë lagjes së tij. Ideja që ai zgjedh restorante jashtë qytetit fillimisht mund të të duket si diçka bujare dhe formë e xhentilesës. Në fakt, ai thjesht nuk do që t’ju shohin të dyve bashkë si çift.
2. Partneri yt preferon të rrini më mirë në banesën tënde sesa të të ftojë në shtëpinë e tij. Justifikimet që nxjerr janë të paqena. Sepse, nëse i bën një vizitë në shtëpi ka mundësi të zbulosh se “dashuria jote e madhe” mund të jetë edhe dashuria e ndonjë tjetre.
3. I dashuri yt këmbëngul që të flini bashkë shumë shpejt pas njohjes. Domosdo, sepse ai nuk mund të humbasë kohën kot me ty (në raste të tjera, ka shumë mundësi që e dashura e tij, ajo para teje, të ndodhet jashtë qytetit dhe ai dëshiron ta shfrytëzojë këtë rast me ty).
4. Ruaju nga komplimentet që tingëllojnë si klishe, të tipit: “Sonte më dukesh e parezistueshme!” apo kur afrohet, duke të pëshpëritur në vesh: “Nuk më pëlqen që më qëndron kaq larg!”. Nëse ai sillet dhe flet si një Casanova, ka shumë mundësi që të jetë i tillë.
5. I dashuri i zemrës tënde shkon shpesh nëpër udhëtime pune, madje edhe kur bëhet fjalë për fundjava? Ka shumë mundësi që ai bën një jetë të dyfishtë dhe fundjavat mund t’i kalojë jashtë qytetit me të dashurën tjetër; në rastin më të keq, edhe me gruan.
6. Kur është larg teje nëpër takime apo udhëtime pune, e ke vënë re që ai nuk të jep shumë detaje rreth punës së tij? Sigurisht, sepse ndoshta ky “njeriu special” me të cilin ke rënë kokë e këmbë në dashuri, nuk është fare atje ku të thotë.
7. E ke vënë re që “shpirti i vogël” preferon të të dërgojë e-maile në vend që të të telefonojë? (Ka shumë mundësi që partnerja e tij, ajo tjetra, të jetë në dhomë me të).
8. Edhe atëherë kur të merr në telefon, ai nuk e zgjat shumë; e mbyll krejt papritur. ndonjëherë edhe pa të dhënë fare shpjegime. Herë të tjera, e ke vënë re që zëri i tij mezi dëgjohet në telefon? Këto nuk janë veçse disa nga shenjat që tregojnë se dikush tjetër është jo vetëm në zemrën e tij, por pranë tij, kur ai ju telefon.
9. Kur e takove për herë të parë, e vure re që ai të dha vetëm numrin e punës, ndërsa u desh një kohë e madhe për t’i rrëmbyer dhe numrin e celularit? (Kjo. për një arsye fare të thjeshtë: nuk do të shqetësohet kur është me tjetrën).
10. Mendohet që pasion i duhet të jetë më i madh në fazën e parë të njohjes, por ja që ai zor se është gati për t’i kaluar fundjavat me ty. Justifikimet janë po ato: çështje pune, probleme në familje, një incident i papritur…
11. Duket sikur “dashuria jote” është gjithmonë vonë për diku dhe mezi pret “të mbarojë punë shpejt” e të largohet.
12. Ai nuk jep shumë detaje rreth historive të tij me ish-të dashurat (sepse historitë e ishe-ve nuk janë të ish-eve, por vazhdojnë akoma).
13. Ai të përsërit gjithmonë të njëjtat histori apo batuta, sepse nuk mban mend nëse t’i ka thënë ty apo tjetrës këto histori.
14. Më në fund po kaloni pak kohë bashkë. Mirëpo ja ku del me një justifikim dhe, me celular në dorë nuk pranon të flasë në praninë tënde, por del jashtë. Me siguri ai të thotë se ishte një telefonatë e rëndësishme pune apo se kishte një ndërprerje të linjës. Në ndonjë rast tjetër duket sikur ai ka probleme me veshkat, sepse janë të pajustifikueshme qëndrimet e gjata në tualet.
15. E ke vënë re se ai nuk i përgjigjet ndonjëherë ca telefonatave të çuditshme? E gjeni dot pse?!
16. Të ka rastisur ndonjëherë të afrohesh pranë kompjuterit, teksa ai është duke kontrolluar e-mail-in? Puf. Menjëherë ai e mbyll dhe ti nuk ke ç’të shohësh më tej.
17. Ai asnjëherë nuk e harron celularin në tavolinë ku ti lehtësisht mund ta kontrollosh. Sepse ai nuk mund të të lejojë që të mësosh diçka të papritur të cilën ti me siguri nuk do ta mirëpresësh.
18. Miqtë apo kolegët e tij nuk ndihen rehat në praninë tuaj.
19. Nëse zbuloni se miqtë e tij janë tipa mashtruesish, ka shumë mundësi që edhe “princi juaj” të mos bëjë përjashtim.
20. Ti zbulon se i dashuri yt nuk ka qenë i ndershëm në lidhjet e mëparshme. Nëse ai ka tradhtuar më parë, ka shumë mundësi ta bëjë përsëri.
