Ministrja e Infrastrukturës dhe Energjetikës shpjegoi gjatë një inspektimi dy dite me pare në ambientet e Drejtorisë së Shërbimit të Transportit Rrugor në Berat, ndryshimet e vendimit për importin e makinave.
Ministrja Balluku tha se ndryshimet parashikojnë që të gjitha makinat e përdorura, të cilat do të hyjnë në vend pas 1 janarit 2019, do të jenë të standardit “Euro 4”, pra do të ndalohen vetëm ato të prodhuara para 2005-s. Vendimi i mëparshëm parashikonte që në vend të importoheshin vetëm makinat “Euro 5”, pra ato të prodhuara nga 2010-ta e në vijim.
“Me VKM-në e re, nuk do të ketë më mjete të 2004-s të targuara apo të 2003-shit, pasi standardi që këtu e tutje do të jetë standardi i emetimit ‘Euro 4’, i cili përfshin makinat e prodhuara nga viti 2005 e tutje. Sigurisht, ky është një ndryshim i fundit që erdhi në VKMnë nr. 633, për shkak edhe të kërkesës së qytetarëve. Është rishikuar, por ndërkohë është zbatuar standardi europian i 2004-s, duke respektuar edhe ambientin sepse edhe kjo është diçka shumë e rëndësishme”, u shpreh Balluku.
Ministrja kërkoi nga punonjësit e Drejtorisë së Shërbimit të Transportit Rrugor që të informojnë qytetarët, të cilët paraqiten pranë zyrave të tyre se tashmë është shtyrë deri më 31 dhjetor afati i hyrjes në fuqi në VKM-së.
“Ajo çfarë ju duhet t’u shpjegoni të gjithë qytetarëve që vijnë këtu, është shtyrja e afatit të hyrjes në fuqi e kësaj VKM-je, pra deri në 31 dhjetor, duke qenë se ka qenë një shqetësim shumë i madh i të gjithë qytetarëve afati shkurtër, sigurisht edhe i tregtarëve, por ajo që neve na intereson më tepër dhe vëmendja, sigurisht është tek ajo çfarë qytetarët kërkojnë”, theksoi Balluku.
VENDIMI
Më herët, qeveria miratoi ndryshimet e vendimit për përmbushjen e kritereve të makinave, që do të lejohen të importohen. Gazeta boton të plotë kushtet teknike të shkarkimit të gazrave sipas standardit “euro” që duhet të përmbushin makinat, të cilat do të lejohen të importohen.
Sipas këtyre ndryshimeve, qytetarët do të lejohen të importojnë në vend makina të përdorura me vit prodhimi nga 1 janari 2005, që u përkasin standardit “Euro 4”. Për të gjithë ata që kanë zhdoganuar makinat e vjetra, numri i të cilave arrin 60 mijë, por nuk kanë mundur t’i regjistrojnë, kanë afat deri më 31 dhjetor për regjistrimin.
Makinat e vjetra që kanë hyrë në vend, por nuk po arrijnë të zhdoganohen për shkak të mosplotësimit të standardeve të shkarkimit të gazrave, kanë afat deri më 31 dhjetor të kryejnë procedurat. Po ashtu, vendimi mbajti të pandryshuar kriterin për zhdoganimin e makinave të reja, të cilat duhet të përmbushin standardin “Euro 5”.
TABELA E STANDARDEVE TE SHKARKIMIT PER AUTOMJETET
EURO 1
1 janar 1991 deri më 31 dhjetor 1995
EURO 2
1 janar 1996 deri më 31 dhjetor 1999
EURO 3
1 janar 2000 deri më 31 dhjetor 2004
EURO 4
1 janar 2005 deri më 31 dhjetor 2009
EURO 5
1 janar 2010 deri më 31 dhjetor 2015
EURO 6
1 janar 2016 deri më 31 dhjetor 2021
