“Corriere della Sera” intervistoi ish-presidentin e Milanit, Silvio Berlusconi, sepse fjala e tij ka shumë peshë në prag të derbit të radhës të Madoninës. Këtu janë disa nga deklaratat e tij: “Derbi më i mirë për mua? Ishte gjysmëfinalja e dyfishtë e Ligës së Kampionëve në vitin 2003. Ne eliminuam Interin në Milano dhe pastaj mundëm Juventusin në finalen e Manchesterit”.
Në vazhdim të intervistës, “Kavalieri” përsëriti për herë të pestë besimin e tij kuqezi, duke mohuar një herë e përgjithmonë legjendën e lashtë, që e pikturon atë si mbështetës të Interit, para se të bëhej president: “Unë i kam mohuar gjithmonë këto thashetheme. Jam rritur si tifoz i Milanit, në një familje milaniste”.
Po ashtu, ish-presidenti ndalet te derbi i famshëm, i fituar 6-0. Berlusconi mohon ta ketë festuar atë triumf: “U luajt të premten, në prag të zgjedhjeve politike. Unë isha në Romë, i angazhuar në mitingun përmbyllës të fushatës zgjedhore. Ishte një paraqitje e mirë nga Milani. Natyrisht, isha i lumtur me fitoren, por iu ankova trajnerit për rezultatin e tepërt. Sepse në futboll, pasi rezultati të sigurohet me një diferencë të konsiderueshme golash dhe ta kesh lojën në dorë, është e kotë dhe e padrejtë ta turpërosh kundërshtarin”.
