Në fundin e viteve ’90, fytyra e tij engjëllore ishte e ngjitur në dhomat e shumicës së vajzave, nga SHBA deri në Japoni. Sot, edhe pse pak më shumë se 30-vjeçar, është vështirë ta njohësh.
I dobët, në luftë të përhershme me abuzimin e drogës dhe të problemeve mendore, pak a shumë të gjithë e kanë harruar.
Flasim për Aaron Carter, një nga këngëtarët “mit” për gjeneratën e adoleshenteve të asaj dekade. Fati dukej sikur i kishte buzëqeshur atij, duke i hapur lehtësisht rrugën e showbiz duke qenë vëllai i vogël i një tjetër miti të muzikës pop, Nick Carter, i njohur edhe si “bjondi” i Backstreet Boys.
Albumi i tij i parë, kur ishte vetëm 9 vjeç, shiti miliona kopje, i dyti akoma më shumë, me këngë si “Aaron Party” etj. Merrte pjesë në programet më të famshme, madje prej tyre ndiqte jetën e familjes Carter 24 orë.
Disa nga aktoret dhe këngëtaret më të famshme të momentit, si Lindsay Lohan dhe Hilary Duff, përfliteshin si kishin flirte me të.
Sot trishtohesh kur ai tregon historinë e tij, se si merr kudo që shkon një qese të madhe plot mjekime. “Zyrtarisht vuaj nga personalitete të shumëfishta, skizofreni, ankth akut. Marr Xanax, Seroquel, Gabapentin, Idrosizin, Trazodon, Omeprazol. Kjo është vërteta dhe nuk mund të bëj asgjë”, thotë ai në një reality show mjekësor ku kërkon “shpëtim” për vete dhe të ëmën.
Sikur mos të mjaftonte, edhe mamaja e tij, Jane, tashmë është pothuajse e alkoolizuar, ndërsa Aaron nuk përmend në asnjë moment vëllain e madh Nick. Një histori e trishtuar, por që tregon se jo gjithçka rreth yjeve vezullon.
