Shtatë persona janë vënë në pranga pas një super operacioni të policisë. Drejtori i Policisë së Vlorës, Artion Duka, në një konferencë për mediat ditën e sotme u shpreh se në kuadër të operacionit të koduar “Vjeshta” u shpallën në kërkim edhe tre persona të tjerë.
Personat e vënë në pranga janë Çerçiz Velaj 33 vjeç, banues në fshatin Lapardha, Bashkia Selenicë; Enton Likaj, 28 vjeç, banues në fshatin Kotë, Bashkia Selenicë; Daniel Nikaj, 22 vjeç, banues në fshatin Mazhar, Bashkia Selenicë; Altin Veizaj (Shkëlzen), 37 vjeç, banues në Vlorë; Antonio Veizaj, 27 vjeç, banues në Vlorë; Marjo Veizaj, 22 vjeç, banues në Vlorë; Romeo Likaj, 29 vjeç, banues në fshatin Lapardha, Bashkia Selenicë.
Ndërkohë gjatë aksionit u sekuestruan 3 armë zjarri (2 kallashnikov dhe 1 pistoletë), 1 226 000 lekë dhe 4 850 €uro, 3 automjete dhe 19 aparate celulare, si dhe janë asgjësuar bimë dhe fidanë kanabis sativa
Sipas drejtorit të policisë në vazhdimësi të hetimit ndaj këtyre personave janë evidentuar edhe 24 raste të kultivimit të bimëve narkotike në 5 njësi të ndryshme administrative, Armen, Sevaster, Brataj, Kotë dhe Vllahinë. Në lidhje me këto raste janë arrestuar 8 persona, proceduar 4 të tjerë dhe janë shpallur në kërkim 4 persona.
Duka tha se po vazhdon hetimi për dokumentimin e plotë ligjor të personave të tjerë të përshirë në këtë aktivitet kriminal.
