Mbrëmjen e 6 shkurtit, Alketa Vejsiu u ngjit në skenën e teatrit Ariston, me një skenografi madhështore nga Gaetano Castelli, si bashkëprezantuese e Amadeos dhe Georgina Rodriguez, para miliona shikuesve italianë, shqiptarë dhe nga e gjithë Europa.
Emisioni “Jo vetëm Modë” ka realizuar një intervistë me moderatoren para ngjitjes së saj në skenën e Sanremos, ku Alketa ka treguar se ka tre vite që punon për këtë ëndërr që tashmë u bë realitet.
“Kam mbi tre vite që punoj për këtë gjë. Mbi tre vite që kam kontakte shumë të rëndësishme pune këtu, është një nga menaxherët dhe producentët më të mirë të Italisë që është kujdesur gjatë gjithë këtyre viteve, që unë një copëz Italie ta sjell edhe në Shqipëri. Kam trokitur në shumë dyer këtu në Itali, me dëshirën për të bërë më shumë se një treg aq miliona shqiptarë sa jemi neve, sepse gjithmonë kam menduar se bashkë me mua do jetë edhe Shqipëria. Edhe patjetër që unë nuk do largohem nga Shqipëria, sepse atje kam ndërtuar jetën time, ëndrrat, televizionin, biznesin.”
Më tej, Vejsiu tregon se gjithçka nisi nga një ëndërr që ajo kishte parë para 3 vitesh, kur ishte me pushime në Hawaii. Në këtë ëndërr, ajo kishte parë Maria de Filipi që i thoshte: Po ti pse nuk vjen në Itali, çfarë bën në Shqipëri?
Pas kësaj ëndrre ajo vendosi të dërgonte edhe email-in e parë. Ka qenë një trajektore e gjatë, me shumë dyer ku ka trokitur, madje edhe me zhgënjime gjatë këtij procesi.
“Pashë një ditë të bukur një ëndërr 3 vite më parë, në pushime, shumë larg, në anën tjetër të botës, në Hawaii. Edhe ishte një ëndërr shumë interesante ku Maria de Filippi më thoshte: Po ti pse nuk vjen në Itali, çfarë bën në Shqipëri? Po kështu është në fakt historia e vërtetë, atë ditë unë bëra email-in e parë dhe e dërgova atje ku mendova. Kam patur një trajektore të gjatë me shumë ulje-ngritje, me dyer ku kam trokitur, kontakte që disa janë realizuar, disa mbetën rrugës, edhe jam zhgënjyer gjatë këtij procesi. Por mendoj që dera e duhur ku trokita ishte ky producent i jashtëzakonshëm, i cili pastaj erdhi në Shqipëri më vizitoi, më ka parë, më ka ndjekur në produksionet që bëjmë në televizionin Klan. Në këtë drejtim jam me shumë fat, se ndonjëherë mund të jesh shumë i mirë, mund ta bësh punën shumë mirë por nuk të zbulojnë nuk e dinë që ti ekziston”.
Për emisionin “Jo vetëm modë”, në Tv Klan moderatorja e njohur Alketa Vejsiu ka treguar emocionet dhe disa detaje mjaft interesante para ngjitjes së saj në skenën e teatrit Ariston, si bashkëprezantuese e Amadeos dhe Georgina Rodriguez në Sanremo.
Në lidhje me të ardhmen e saj në televizion, ajo shprehet se nuk e kufizon veten vetëm në kornizat gjeografike të një vendi. Për shkak të punës, ajo udhëton shumë dhe nuk e shikon aspak të vështirë të bëjë udhëtime të shpeshta drejt Romës.
“Unë mendoj si qytetare e botës, kështu që nuk dua ta kufizoj veten në kornizat gjeografike të një vendi. Shqipëria është me mua kudo ku unë jam, unë do jem gjithmonë në Shqipëri, por bota është bërë kaq globale dhe kaq dinamike. Unë gjatë gjithë kohës jam në lëvizje, udhëtoj për efekt edhe të punës që bëj, kështu që nuk e shikoj absolutisht të vështirë 50 minuta Tiranë-Romë”.
Më tej, Alketa shton se do rikthehet sërish me emisionin “Piter Pan” dhe me shumë mundësi në shtator do vijë në televizionin Klan me një patentë të re.
“Në shtator do kthehem në Televizionin Klan besoj me një patentë të re. Jeta vazhdon normalisht. Jemi në rrugë të re. Bota do të vazhdojë të rrotullohet për mua, për shqiptarët italianët edhe pas Sanremos. Duket sikur çfarë po ndodh. Është momenti i një ëndrre shumë të bukur, që duhet t’i japë gëzim dhe shpresë të gjitha vajzave që kanë ëndrra. Që për ëndrrat duhet të punosh nuk duhet vetëm të ëndërrosh. Asgjë nuk vjen nga qielli, e servirur në një tabaka ari dhe ti pastaj të shijosh rezultatet. Duhet të lëvizësh”.
