Iu shua e gjithë familja nga tërmeti, kryefamiljari kërkon të dijë për fëmijët nga spitali
7 prej 9 pjesëtarëve të familjes Cara u shuan në tërmetin tragjik të së martës. Albert Cara, një prej të mbijetuarve ndodhet i dëmtuar në Spitalin Ushtarak në Tiranë. Ai nuk e di ende që 3 fëmijët e tij, 2 djemtë dhe një vajzë, sëbashku me bashkëshorten, nuk jetojnë më, ashtu sikurse edhe e fejuara e një prej djemve.
Familja jetonte në katin e 5 të këtij pallati në Thumanë, që është rrënuar tërësisht. Në katin e katërt jetonin pjesëtarë të tjerë të familjes Cara. Nga kjo familje humbën shpëtoi vajza e xhaxhait të Albertit, Lindita. Vajza e saj, sëbashku me të ëmën, humbën po ashtu jetën.
Tvklan.al nga Thumana mori në intervistë djalin e xhaxhait të Albertit, i cili tregon se kushëriri i tij nuk është ende në dijeni të tragjedisë që i ka ndodhur. Sulë Cara thotë se 4 prej pjesëtarëve të familjes Cara janë ende nën rrënoja. Ndonëse i ndërgjegjshëm se shanset që të kenë mbijetuar janë të vogla, ai ende shpreson që Zoti të bëjë një mrekulli.
Ju jeni familjar, i afërm i familjes Cara. Çfarë ka ndodhur me pjesëtarët e familjes tuaj në Thumanë?
Siç jeni njohur me një fatkeqësi të jashtëzakonshme natyrore, jo vetëm për familjes Cara, por për të gjithë të prekurit e kësaj tragjedie. Unë në këtë banesë kam patur djalin e xhaxhait, i cili jetonte në katin e 5, Albert Cara. Aktualisht ndodhet në Spitalin Ushtarak. Thuhet që është mirë, kaq të dhëna kam deri tani për momentin, sepse kam qenë i angazhuar non stop këtu në vendngjarje. Aktualisht që flasim, Berti ka humbur pothuajse të gjithë pjesëtarët e familjes.
Pothuajse të gjithë pjesëtarët?
Ka humbur bashkëshorten, Fatmirën, e cila ndodhet në morgun e spitalit të Lezhës. Ka humbur djalin Almirin, i cili për momentin është në rrënoja. Ka humbur djalin e vogël, Hasanin, i cili është në morgun e Tiranës. Ka humbur bashkëshorten e Almirit, e cila ndodhet nën rrënoja. Në pjesën e katit të parë kemi pasur edhe nusen e xhaxhait, që ka qenë aty me vajzën Linditën dhe vajzën e vajzës. Lindita mrekullisht ka shpëtuar mbrëmë, forcat e ndërhyrjes greke dhe kosovare kanë bërë të mundur shpëtimin e saj. Mendojmë se është mirë tek Spitali Ushtarak. Ndërsa aktualisht është nën rrënoja, Anthi Cara, pra nusja e xhaxhait me mbesën, që nuk dimë asnjë gjë tjetër, vetëm se momentalisht tani që flasim të katërt e pjesëtarët e familjes Cara janë nën rrënojë.
Po vajza e Albertit?
Vajza e Albertit, Erisa, është në morgun e Tiranës, është konfirmuar e vdekur.
Pra nga 9 pjesëtarë, 7 kanë humbur jetën?
7 mendohet se janë humbur. E them mendohet sepse 4 janë nën rrënoja dhe mbase Zoti bën mrekullinë, të shpresojmë, edhe për pak.
Keni komunikuar me Albertin, ose ndonjë prej pjesëtarëve të familjes tuaj?
Jemi në një moment të vështirë, sepse kam dërguar atje, vëllain e Albertit, Taulantin. Dje ka qenë mirë, sot ka qenë me mjaft probleme. Probleme të cilat ai kërkon të dijë për fëmijët. Ne për hir të së vërtetës nuk i kemi treguar, deri më tani dhe kam përshtypjen se do të na krijojë një situatë mjaft problematike për nesër, sepse nesër mund të jetë edhe ceremonia e varrimit. Do të përpiqemi që të hyjmë në kontakt me mjekun që po merret, që të na japë të gjithë udhëzimet e nevojshme, sepse ne jemi nga një zonë që çfarë të në na ndodhë, na ndodh, Zoti të na falë ça të na falë, por jemi të detyruar ta vëmë në dijeni, nëse mjeku do të na marrë përsipër që të paktën nga kjo tragjedi të mos bëjmë viktimë edhe Bertin, sepse është në një moment jo të mirë.
Ka dëmtime Alberti?
Më duket se ka dëmtime, nga kontaktet e fundit që kam deri më tani, duket se ka probleme dhe në shtyllën kurrizore. megjithatë është një informacion që do ta marrim më vonë.
Si ka arritur të shpëtojë?
Grupet e shpëtimit me thënë të drejtën kanë bërë një punë të jashtëzakonshme, sepse ky ka qenë në një pozicion, ka rënë nga kati i 5 dhe e gjithë baza materiale është përmbledhur në një kat. Nuk e dimë tani sesi ka shpëtuar, Zoti e ka shpëtuar.
Ka dalë me këmbët e veta apo e kanë ndihmuar?
Jo, jo, kanë qenë forcat speciale të Kosovës, forcat e shpëtimit të Greqisë, ka qenë forcat e shpëtim-minierave dhe është punuar gati 5-6 orë të bërë të mundur që të dalë i padëmtuar, të paktën ka dalë shëndoshë.
Prej sa vitesh jetonte në Thumanë Alberti me familjen e tij? Kur ishin zhvendosur, mund të na jepni disa detaje njerëzore?
Ne me origjinë jemi nga Kurbneshi i Mirditës. Berti ka ardhur në Thumanë rreth viteve 90-91, ndërsa xhaxhai tjetër që ka qenë poshtë ka ardhur rreth viteve 50.
Këtu vendosur të jetonin?
Po, sepse asokohe Thumana ishte fermë. Atëherë punësimi nuk ishte shumë problem, sepse ferma atëherë kishte mundësi punësimi. Kështu që mbase kjo ka qenë një ndër shkaqet, sepse këtu kam kuptuar diçka tjetër. Në zonën e Thumanës ku ra kjo fatkeqësi, ka shumë matjanë, ka shumë mirditorë, nga zonat e tjera. Kanë qenë shumë punëtorë dhe ngaqë këtu ka qenë tokë fushore dhe një njeri i punës që vjen nga zona me pak tokë, me shumë tokë, mbase janë ndjerë mirë. Ky ka qenë shkaku kryesor.
Kanë pasur dëmtime pallatet në tërmetet e mëparshme? Pra kanë pasur ndonjë paralajmërim për prishjen e strukturave?
Në fakt ne kur bien tërmetet puna e parë që bëjmë lidhemi me telefonata të menjëhershme me njerëzit më të afërt. Në tërmetet e para që kanë rënë, në komunikimin që kam pasur personalisht me Albertin, e kam pyetur nëse kanë patur probleme, më ka thënë jo.
Banesat në gjykimin tuaj si janë?
Nuk më ka thënë asnjëherë që ka patur probleme, në dijeninë time.
Kush ju njoftoi për ngjarjen e rëndë?
Për ngjarjen e rëndë ngaqë ne nuk po na dilte në telefon, sepse duke e ditur që Thumana është një zonë me aktivitet sizmik të lartë, nuk na është hapur telefoni dhe kemi patur jashtëzakonisht shumë vështirësi për t’u nisur dhe pastaj kemi biseduar me një të njohurin tonë, për momentin nuk më kujtohet emri dhe na ka thënë që po, më duket se është shembur pallati. Pastaj Taulanti, i vëllai nga Tirana, është nisur menjëherë. Menjëherë pastaj kam ardhur dhe unë. Mund të kemi ardhur këtu rreth orës 5 e gjysmë, 6 pa çerek, ku gjithçka këtu ishte gërmadhë.
