Kreu i Policisë së Shtetit, haki Çako ka reaguar pas akuzave të LSI se nuk janë marrë masat e duhura për të garantuar sigurinë e jetës së mbështetësve të forcave politike gjatë fushatës elektorale.
Në një konferencë mbrëmjen e sotme, nënkryetari i LSI kërkoi shkarkimin nga detyra të Haki Çakos, pas rasteve të dhunës ndaj mbështetësve të LSI në Pukë e Fushë-Krujë.
Sipas Luan Ramës, policia nuk ka ndërhyrë për rastet dhe as ka identifikuar apo kapur autorët e dhunës.
Por në reagimin zyrtar pas këtyre akuzave, drejtori i Përgjithshëm i Policisë së Shtetit, Haki Çako, thekson se gjatë paradites së sotme iu ka nisur një telegram me udhëzime drejtuesve qendrorë e vendorë të Policisë, për të garantuar rendin dhe sigurinë gjatë fushatës.
REAGIMI I PLOTE
Drejtues të strukturave qendrore dhe vendore të Policisë së Shtetit, në vlerësim të ngarkesës aktuale dhe në zbatim të detyrave për prioritetin e rëndësishëm ligjor të menaxhimit të procesit zgjedhor; në kushtet e përballimit të ditëve të fundit të fushatës zgjedhore ku intensiteti i aktiviteteve dhe i incidenteve me motive politike duket në rritje, Ju udhëzoj:
– për angazhim maksimal dhe profesional të të gjitha strukturave policore në bazë e zbatim të ligjit për Policinë e Shtetit, Kodin Zgjedhor dhe aktet e tjera normative
– të kryeni vlerësim të menjëhershëm, objektiv, intensiv dhe profesional të ngjarjeve, situatave dhe pretendimeve, kallëzimeve të subjekteve politike ose individëve në kuadrin politik.
– në të gjitha rastet të njoftohen Prokurorët e rretheve gjyqësore, të kryhen veprime konform ligjit për Policinë e Shtetit dhe Kodin e Procedures Penale
– të ruhet gjakftohtësia në komunikim dhe etika policore
– të përcillet informacion objektiv dhe real për çdo veprim policor dhe situatë në qendrën e koordinimit të procesit zgjedhor në Drejtorinë e Përgjithshme të Policisë së Shtetit.
Drejtori i Përgjithshëm i Policisë së Shtetit
Drejtues Madhor Haki Çako
