Presidenti Ilir Meta ka sqaruar takimin që zhvilloi më 20 Dhjetor me Aleksandër Soros, zv/Presidentin e Fondacionit “Shoqëria e Hapur”, djalin e miliarderit amerikan George Soros.
Përmes një deklarate publike, kreu i shtetit thotë se gjithçka ka nisur që prej muajit korrik, kur bëri akuzat në drejtim të Fondacionit “Shoqëria e Hapur” për kapjen e drejtësisë së reformuar.
Sipas Presidentit, që prej asaj kohe ka pasur disa kërkesa për takim nga përfaqësues të këtij fondacioni.
Sikurse u bë publike edhe në njoftimin e Presidencës të premten, Meta dhe Alex Soros biseduan për Reformën në Drejtësi për të cilën kreu i shtetit akuzon Kryeministrin, për përkeqësimin e lirisë së shprehjes, për rolin e shoqërisë civile dhe për menaxhimin e pasojave të tërmetit.
Sa i përket “Mini-Shengenit” Ballkanik, samiti i tretë i të cilit u zhvillua këtë fundjavë në Tiranë, Presidenti Ilir Meta thotë se kjo temë nuk u shtrua për diskutim, teksa ka theksuar se qëndrimi i tij për Kosovën dhe taksën e “Rrugës së Kombit” nuk ndryshon.
Sqarimi publik i Presidentit Ilir Meta:
Një përgjigje për mikun tim Prof. Kastriot Islami dhe gjithë të tjerët!
I mirëkuptoj reagimet emocionale të sinqerta apo të nxitura, lidhur me takimin tim me z.Aleksandër Soros, Zëvendëspresident i Fondacionit “Shoqëria e hapur”, të bërë publik nga Zëdhënësi im z.Blushi.
Nuk më dukej me vend të reagoja ndaj tyre, por pas shkrimit të z.Islami, i cili veçse intelektual i njohur, është edhe ish-ministër i Jashtëm, më duhet të sqaroj disa rrethana dhe të shuaj çdo keqkuptim.
Unë nuk i di arsyet e vizitës së z.Soros në Tiranë, dhe as kam pyetur për to, pasi Shqipëria është e hapur për t’u vizituar nga të gjithë.
Ajo që di është se nga muaji Korrik kur unë bëra publike disa akuza për rolin e Fondacionit “Shoqëria e hapur” për kapjen e drejtësisë së re nga Kryeministri, ka patur disa kërkesa zyrtare për takim nga përfaqësues të këtij Fondacioni, në veçanti për të sqaruar pozicionin e tyre lidhur me Reformën në Drejtësi.
Do të ishte jo etike nga ana ime që ndërsa kam shprehur publikisht rezervat e mia për ta, t’i shmangesha një takimi të drejtpërdrejtë, për t’u shprehur këto shqetësime edhe nga afër. Për më tepër që shmangiet dhe gënjeshtrat nuk janë në karakterin tim.
Takimi është bërë me kërkesë zyrtare dhe ka qenë zyrtar. Tema e të ashtuquajturit “Mini-Shengen” nuk ka ekzistuar në takim.
Tre temat që unë jam përqëndruar kanë qenë kapja e drejtësisë nga Kryeministri, përkeqësimi i lirisë së medias dhe të lirisë së shprehjes, dhe gjallërimi i shoqërisë civile në vend kundër shkeljes së të drejtave të njeriut dhe dhunimit të vlerave të demokracisë.
E vetmja temë që nuk u përmend nga zëdhënësi im ishte ajo e menaxhimit të pasojave të tërmetit.
Lidhur me të ashtuquajturin “Mini-Shengen” unë e kam bërë të qartë publikisht e në mënyrë të përsëritur se çdo iniciativë rajonale është e dobishme kur është gjithëpërfshirëse e jo përjashtuese, kur udhëhiqet nga partneriteti dhe jo paternalizmi, kur sjell kohezion dhe jo konfuzion, e aq më tepër përçarje.
Ndërsa për qëndrimin tim ndaj shtetit të Kosovës dhe Pavarësisë së saj të gjithë e dinë qëndrimin tim. Aq më tepër për Taksën e Kalimashit.
Asnjë takim nuk e ndryshon axhendën e Presidentit të Republikës së Shqipërisë dhe përkushtimin e Tij për t’iu rikthyer sovranitetin të gjithë qytetarëve shqiptarë përmes garantimit të zbatimit të referendumit si e drejtë kushtetuese.
