Mjeku Ilir Alimehmeti tha për Euronews Albania se nisur nga ecuria e deritanishme e virusit COVID-19 në vendin tonë duket se jemi duke hyrë në platonë e kurbës, por kjo sipas tij nuk do të thotë se do të kemi një rënie të menjëhershme.
Ai theksoi se masat kufizuese tek ne u morën në kohë rekord dhe ky është një nga faktorët kryesorë pse epidemia tek ne u shfaq më butë, por ekzistojnë edhe hipoteza sipas të cilave njerëzit në vende si Shqipëria janë pak më imunë.
“Nëse mund t’i themi plato kësaj tonës. Rritja jonë ka qenë lineare. Në nuk patëm asnjëherë një rritje rastesh me COVVID-19. Kanë qenë të njëjtat shifra pothuajse çdo ditë. 20 raste në ditë si mesatare nuk është ndonjë shifër shqetësuese. Tek ne epidemia është shfaqur më butë. Qëndrojë disa hipoteza që thonë se njerëzit në vende si Shqipëria janë pak më imunë. Megjithatë masat tek ne ishin shumë më shpejt në kohë në krahasim me Italinë. Kjo mund të ketë dhënë efektin e rrafshimit të kurbës”, tha mjeku.
Mjeku Alimehmeti pohoi faktin se rritja e temperaturave, ashtu siç pritej dhe siç është vërtetuar nga studime të ndryshme do të sjellë zbutjen e virusit, por kurrsesi zhdukjen e tij.
“Pandemia nuk do të përfundojë, nuk është këtu për t’u zhdukur, gjithmonë do ketë një vatër gjallë. Sars u zhduk për një arsye, se ishin gjithsej 8 mijë vetë të infektuar, ndërsa më COVID janë mbi 1 mln të infektuar. Do bashkëjetojmë me të, do e kuptojmë çdo ditë më shumë, në pritje të vaksinës”, tha ai.
I pyetur lidhur me masat e para liruese që duhen marrë kur të dalim nga gjendja e pandemisë, z. Alimehmeti theksoi faktin se me rëndësi është që të mos kuptohej se kjo hapje nuk është një çelës dritash.
“Duhet të vijë shumë ngadalë, duke i dhënë kohë që të kuptohet nëse këto lehtësime janë OK, a duhen shtuar të tjera. E para ekspozimi i njerëzve më aktivë nga ana imunitare, nuk mund të bëhet hapja duke nisur nga moshat e vjetra. Hapja më shumë e orareve të lëvizjeve. Hapja e disa aktiviteteve jopublike. Baret, restorantet etj., paraqesin ende risk”, tha Alimehmeti.
