Kryeministri Edi Rama në një rrëfim të rrallë për gazetarin Blendi Fevziu në emisionin “Opinion” ka folur për marrëdhënien që ai ka më ish-kryeministrin dhe ish-drejtuesin e PS, Fatos Nanon.
Rama e quan raportin me Nanon të bukur, pasi nuk flasin shpesh, por kuptohen shumë mirë me njëri-tjetrin. Kreu i qeverisë shtoi se Nano ka qenë para tij në zyrën ku ai është sot, ka drejtuar vendin dhe sipas tij e di shumë mirë se çfarë është vetmia.
Blendi Fevziu: Për herë të parë në këtë zyrë ke hyrë për të takuar Fatos Nanon?
Edi Rama: Po, po.
Fevziu: Ai ka qenë Kryeministri i parë që keni takuar?
Rama: Ai ka qenë Kryeministri i parë që kam takuar unë këtu. Po.
Fevziu: Dhe si i ke sot raportet me Nanon?
Rama: Të them të drejtën raportin sot mund ta quaj të bukur. Është një raport shumë i bukur. Sepse…
Fevziu: Çfarë domethënë i bukur?
Rama: I bukur, komunikojmë jo intensivisht, hera-herës. E bukura e këtij raporti është se ai ka qenë këtu dhe ai e di, dhe e di fizikisht, jo thjesht me eksperiencë dhe e di se çfarë do të thotë presioni i kësaj zyre. Dhe mbi të gjitha ai dhe të tjerr dhe të tjerët e di se çfarë është vetmia kur je në këtë zyrë. Njerëzit mendojnë se kur hipën në majë, je i rrethuar me një mori njerëzisht. Në fakt në majë je më vetëm se sa asnjëherë tjetër. Se kur vjen koha, momenti i vendimeve të vështira, je komplet vetëm.
Fevziu: Të gjithë bëjnë sikur nuk e kanë mendjen.
Rama: Nuk ka rëndësi, bëjnë s’bëjnë, ti je komplet vetëm. Për këtë arsye, eksperienca, ndjesia fizike e të jetuarit në këtë zyrë, sfidat, sfilitjet, përplasjet. Edhe ajo që kemi kaluar me njëri-tjetrin, momentet jo të mira të marrëdhënies tonë, na e kanë bërë këtë raport shumë të bukur.
