Ministrja e Jashtme Olta Xhaçka prezantoi sanksionet e marra nga Shqipëria për Rusinë, pasi kjo e fundit po sulmon ushtarakisht Ukrainën prej 4 ditësh.
Xhaçka tha se Shqipëria iu është bashkuar masave shtrënguese të Bashkimit Evropian ndaj Rusisë, përfshirë ngrirjen e aseteve bankare.
“Këto masa kanë karakter individual dhe ekonomik”, sqaroi ministrja.
“Nga sot, hapësira ajrore e Shqipërisë mbyllet për të gjithë operatorët ajrorë rusë. Shqipëria s’merr pjesë në asnjë përballje sportive me Federatën Ruse, deri në fund të pushtimit. Po punojmë për ofrimin e ndihmave materiale ushtarake dhe spitalore për Ukrainën”, tha Xhaçka.
Sanksionet e Shqipërisë ndaj Rusisë:
-Shkrirje e aseteve bankare të 654 individëve, nisur nga Putini, si edhe të 56 subjekteve.
-Sanksione ekonomike që përfshijnë masa kufizuese në financë, energji, transport dhe teknologji.
-Shqipëria mbyll hapësirën ajrore për kompanitë ajrore ruse.
-Shqipëria nuk do të luajë asnjë ndeshje sportive kundër Kombëtares së Rusisë, me të cilën Shqipëria kishte një ndeshje të programuar në qershor të 2022.
-Nuk do të lejohen të hyjnë në Shqipëri personat e listuar nga BE.
Xhaçka tha se po hartohet baza ligjore për zbatimin e këtyre masave shtrënguese, ndërsa rezoluta e propozuar nga Shqipëria do të votohet për t’u diskutuar në Asamblenë e Përgjithshme.
Ajo njoftoi po ashtu se po punohet për t’i ofruar Ukrainës ndihma spitalore dhe ushtarake.
