3 ndeshje 0 gola. Rruga e rrjetës është kthyer në një “makth” për Kombëtaren shqiptare. Të besuarit e Edi Rejës nuk kanë shkuar më shumë se barazimi pa gola në transfertë ndaj Lituanisë.
Me emra të rinj në formacion, Reja nuk arriti sërish të ndërtojë një skuadër fituese. Në ndryshim nga ndeshja me Kazakistanin, kuqezinjtë tentuan menjëherë të gjenin golin, duke krijuar disa raste të mira në pjesën e parë, por pa mundur të realizojnë. Edhe në pjesën e dytë, Shqipëria vijoi sulmet, por Broja e Seferi gabuan raste flagrante përballë portierit lituan.
Trajneri Reja aktivizoi në pjesën e dytë edhe Vrionin e Manajn, por as këta dy sulmues nuk arritën ta dërgonin topin në rrjetën e vendasve, duke bërë që Shqipëria të marrë barazimin e dytë radhazi në Ligën e Kombeve pas atij 3 ditë më parë në Kazakistan.
Pas këtij takimi, kuqezinjtë renditen në vendin e dytë me 5 pikë, po aq sa Lituania e vendit të parë. Dy ndeshjet e fundit për Shqipërinë luhen në Tiranë, me Kazakistanin më 15 nëntor dhe ndaj Bjellorusisë 3 ditë më pas.
