Kryeministri Edi Rama ka prezantuar platformën online të “bashkëqeverisjes me qytetarët”. Shefi i qeverisë tha se ky mekanizëm forcon demokracinë në vend. Ai tha se çdo ankesë do të verifikohet nga kjo strukturë e cila do të ndahet në disa sektorë.
Rama tha se “Ky mekanizëm mund të bëhet tmerri i çdo kujt që është mësuar t’i shohë qytetarët nga xhepi për t’i dhënë shërbimin”.
Por si do të funksionojë ky mekanizëm? Kryeministri ka dhënë disa detaje lidhur me dërgimin e ankesave dhe trajtimin e tyre në kohë në faqen e ‘platformës së bashkëqeverisjes’.
“Qysh ditën e hënë do jenë në gadishmëri afro 25-30 persona. Këta do ndahen në grupe, 1 grup qëndror në kryeminsitri dhe grupet e tjera në çdo ministri. Sipas të gjitha kategorive që ka platforma, opinionet, kërkesat, ankesat, sugjerimet, nismat, ndahen në bazë të kategorive dhe trajtohen në mënyrë sektoriale nga çdo 1 prej këtyre grupeve në çdo institucion qëndror. Qëllimi ëhstë që për çdo çështje që kërkon ndërhyrje të drejtëpërdrejtë nga titullari i institucionit zgjidhja të jepet në kohë nga titullari. Çdo anëtar i kabinetit do mbajë përgjegjësi për trajtimin e të gjitha adresimeve të cilësdo natyrë në kuptimin e përgjigjes”, deklaroi Rama.
Kryeministri është ndalur edhe te trajtimi i problemeve me pushtetin vendor. Ai ka sqaruar se do të nënshkruhen marrëveshje me secilën bashki pa përjashtim, për t’i bërë pjesë të këtij mekanizmi që i shërben qytetarëve.
“Në dritaren e parë, dritaren e ankesave, ka një grup dritaresh për të bërë zgjedhjen se ku drejtohet ankesa, harta, qarku përkatës, institucioni përkatës dhe pjesa e institucioneve vendore, ne do fillojmë të nënshkruajmë një marrëveshje mirëkuptimi me të gjtihë kryetarët e bashkive pa dallim që do përfshihen në këtë proces në funksion të zgjidhjes së problemeve”, tha Rama.
Një dritare e posaçme do të jetë për nismat e caktuara. Çdo qytetar mund të shpreh mendimin e tij nëse jep miratimin ose jo.
“Brenda 20 ditësh, çdokush që shkruan një opinion, merr një përgjigje. Ka edhe një dritare për konsultimin publik. Këtu është interpelanca. Ne do t’i japim mundësinë qytetarit të thërrasin në interpelancë kryeministrin, ministirn, njësoj si deputetët. Sigurisht që duhet një numër i caktuar ankesash, për një problem të nxehtë mund të kërkojnë interpelancë secilin prej nesh. Në platformë mund të kenë akses për të lexuar që të gjithë, por këto të drejta, dhe këto detyrime që burojnë nga ky mekanizëm do t’i kenë vetëm ata që janë anëtarë aktiv të koalicionit qeverisës”, deklaroi kryeministri.
Një dritare e posaçme do të jetë “nota ime”, ku qytetarët do të japin vlerësimin lidhur me shërbimin në zyrat e shtetit. Për të gjithë ata që duan të jenë anëtarë aktivë të atij që kryeministri e quan”koalicioni qeverisës mes Partisë Socialiste dhe njerëzve të zakonshëm”, del online platforma www.shqiperiaqeduam.al.
