E etiketuar si “zonja e hekurt e politikës shqiptare”, Jozefina Topalli rrëfen momentet e saj të para në politikë, vendimet e vështira, por edhe reagimin e familjarëve të saj ndaj situatave të ndryshme.
Në një rrëfim ndryshe në studion e “News 24”, në “Vila 24”, Jozefina tregon mbështetjen e familjarëve të saj përgjatë gjithë viteve të saj në politikë.
E teksa kujton vitet kur ka qenë kryetare e Kuvendit të Shqipërisë, dhe komentet për reagimet e saj ndaj deputetëve të opozitës në atë kohë, Jozefina tregon edhe ato ç’ka i thoshte e ëma në ato momente.
“T’pastë nana mos i shaj”, ishte këshilla që dëgjoja prej saj sa herë që në media komentoheshin përplasje e debate të ndryshme në Kuvend.
E në këtë rast vlen të kujtohet reagimi i komentuar gjerësisht, “Kapini për zhelesh, e qitini jashtë”.
Sa i takon qëndrimit të saj ndaj vendimeve të ndryshme në politikë, dhe etiketimit si “gruaja e hekurt e politikës shqiptare”, Jozefina thotë se “është një perceptim që ndoshta unë i kam dhënë shkas edhe vetë. Politika është një kuzhinë e nxehtë që nuk pate guximin për t’i rezistuar të hedh jashtë. Besoj se kam marrë vendime të forta gjatë kohës që kam qenë në politike, por kjo nuk do të thotë se një politikan i ashpër nuk ka një shpirt të butë. Këto janë plotësuese të njëra-tjetrës”.
Jozefina Topalli tregon edhe vitet kur ka qenë pedagoge, duke u shprehur se “marrëdhëniet me studentët kanë qenë shumë të mira. Përpiqesha të zbuloja sa talent kishin. Përpiqesha të projektoja atë që ata mund të arrinin. Raporti pedagog-student është raporti më i bukur”.
