Edhe zgjedhjet e së martës në Izrael, të katërtat në dy vite, dështuan të prodhojnë një fitues të sigurt e të vetëm për të formuar qeverinë. Por kjo nuk e ndali kryeministrin Benjamin Netanjahu t’i përshkruajë këto zgjedhje si një sukses
Kryeministri Benjamin Netanjahu nuk arriti të sigurojë një shumicë bindëse parlamentare në zgjedhjet e Izraelit të martën, por një marrëveshje e mundshme me një rival të djathtë mund ta nxjerrë atë në fund të fundit fitues.
As fushata në të cilën Netanjahu e vuri theksin tek vaksinimi masiv për COVID-19, që e vuri Izraelin të parin në rang botëror, nuk mundi të kapërcente ngërçin politik dyvjeçar të shoqëruar me katër zgjedhje.
E majta e qendrës së Izraelit doli më mirë sesa pritej, sipas sondazheve të daljes në qendra votimi, pasi e vuri theksin tek akuzat e korrupsionit kundër Netanjahut dhe e akuzoi atë për keqpërdorim të pandemisë.
Por ashtu si blloku tradicional i partive të krahut të djathtë dhe atyre fetare hebraike të Netanjahut, ai nuk e arriti një shumicë qeverisëse në parlamentin me 120 anëtarë.
Ngecja mund të jetë sinjal i bisedimeve të gjata për ndërtimin e koalicionit apo edhe zgjedhje të reja.
Në mediat sociale, 71-vjeçari Netanjahu, pretendoi “një fitore të madhe” për të djathtën dhe partinë e tij Likud. Por parashikimet e kanaleve televizive nuk e mbështesin këtë.
Mbijetesa politike e udhëheqësit më jetëgjatë të Izraelit duket se varet nga 48-vjeçari Naftali Bennett, ministër i Mbrojtjes në një qeveri të mëparshme të Netanjahut dhe udhëheqës i partisë nacionaliste Yamina.
Një ish-ndihmës i zotit Netanjahu i cili ka kohë që kërkon ta zëvendësojë atë, Bennett nuk shprehu angazhimin për qëllimet e tij menjëherë pas mbylljes së vendvotimeve.
“Unë do të bëj vetëm atë që është e mirë për shtetin e Izraelit“, u citua të thoshte Bennett nga një zëdhënës.
Zoti Bennett, një milioner në fushën e teknologjisë së lartë, ka thënë se ai nuk do të shërbente nën udhëheqësin e mundshëm të grupit të qendrës së majtë, 57-vjeçarin Yair Lapid, kreu i partisë Yesh Atid. Ai gjithashtu nuk dha asnjë premtim të prerë publik gjatë fushatës për t’u bashkuar me Netanjahun.
Pasi u transmetuan rezultatet e votimit, Bennett tha se ai mori një telefonatë nga Netanjahu dhe se i tha, “se do të presim rezultatet përfundimtare” përpara se të vendoste për hapat e tij të ardhshëm politikë.
Netanjahu gjithashtu telefonoi aleatët politikë konservatorë dhe i nxiti ata të bashkohen me një “qeveri të fortë, të qëndrueshme të krahut të djathtë”, tha një zëdhënës.
Kryeministri Netanjahu kishte bërë fushatë duke trumbetuar aftësitë e tij udhëheqëse, bazuar në një program që u ka mundësuar gati 50% të izraelitëve të marrin dy dozat e vaksinës.
Por akuzat për ryshfete, mashtrime dhe thyerje të besimit, të cilat Netanjahu i ka mohuar në gjyqin për të që vazhdon, si edhe vështirësitë ekonomike të izraelitëve pësuan gjatë tre bllokimeve në mbarë vendin për shkak të koronavirusit, kanë goditur popullaritetin e tij.
