Ndërprerja e të gjitha aktiviteteve futbollistike, pas dhunës në stadiumin e Kamzës, ka bërë Federatën Shqiptare të Futbollit të modifikojë edhe kalendarin nga muaji mars deri në fundin e sezonit.
Kështu, praktikisht do të shtyhet me disa ditë epilogu i të gjitha garave dhe trofeu i fundit do të caktohet në ditët e para të qershorit.
Sektori i garave në Federatën Shqiptare të Futbollit ka bërë disa modifikime të kalendarit të Kategorisë Superiore dhe Kupës së Shqipërisë, pas një jave ndërprerjeje të aktivitetit.
Ndeshjet e kthimit të turit çerekfinal të Kupës së Shqipërisë do të zhvillohen në datën 3 prill. Ndeshjet gjysmëfinale do të zhvillohen më 24 prill dhe 8 maj.
Java e 36 e Kategorisë Superiore, e planifikuar për t’u luajtur më 25 maj, do të zhvendoset për në datën 29 maj. Finalja e madhe e Kupës së Shqipërisë për edicionin 2018-2019 do të zhvillohet ditën e diel, më 2 qershor, një ndeshje që ul edhe siparin e sezonit.
