Sport Kosova mposhtet thellë nga Anglia, tifozët fitojnë në tribuna

Kosova mposhtet thellë nga Anglia, tifozët fitojnë në tribuna

Duhej të ishte një festë futbolli në Prishtinë, por Anglia nuk pati aspak mëshirë për Kosovën duke e mposhtur me rezultatin 4-0 në stadiumin Fadil Vokrri në një ndeshje ku dardanët luajtën mirë për 79 minuta ku pësuan vetëm një gol dhe patën shanset e tyre, por më pas u shkërmoqën nga tre luanët që shënuan 3 herë në 11 minutat e fundit për një fitore të thellë 0-4.

Serinë e hapi Harry Winks mesfushori i Tottenham i cili përfitoi nga një përgjumje e Dresevic duke çarë në mes të zonës dhe duke shënuar golin e tij të parë me fanellën e Anglisë në minutën e 31-të. Dardanët u përpoqën të reagonin por pa Muriqin dhe Zenelin nuk kishin forcën e duhur për të reaguar dhe në 11 minutat e fundit të ndeshjes ndjenë lodhjen duke humbur përqëndrimin dhe duke pësuar edhe 3 gola të tjerë që mbajnë firmat e Kane, Rashford dhe talentit të Chelsea-t, Mason Mount i cili shënoi golin e tij të parë me Anglinë ashtu si Winks.
Me këtë fitore Anglia e mbylli grupin A në vendin e parë me 21 pikë e ndjekur nga Republika Çeke me 15 që u mposht 1-0 në Bullgari dhe Kosova me 11 pikë. Tashmë dardanët duhet të mendojnë për ndeshjen ndaj Maqedonisë së Veriut në play-off e Nations League në muajin mars.

Atmosfera në stadium ishts jashtëzakonshme dhe habiti edhe vetë shtypin anglez.

“Nuk kemi patur asnjëherë një pritje të tillë”, shkruan The Guardian në komentin e ndeshjes, duke treguar fotografinë e tribunave plot me flamuj anglezë dhe pankarta ku tregohet mirënjohja e popullit kosovar ndaj Anglisë për periudhën e luftës.