Një person ka humbur jetën ndërsa një tjetër rezulton i zhdukur për shkak të motit të keq ka goditur jugun e Italisë.
Në Kalabri dhe në Siçili reshjet e dendura të shiut kanë shkaktuar përmbytje duke bërë që dëmet materiale të jenë të konsiderueshme. Situata më problematike paraqitet në zonën e Katanias ku rrugët e qytetit janë kthyer në lumenj duke bërë që forca e ujit të tërheqë zvarrë edhe disa makina.
5 turistë rrezikuan seriozisht jetën në po këtë zonë, pasi minibusi me të cilin udhëtonin e mori rrjedha e ujit në rrugë. Atyre iu desh të braktisnin mjetin, ndërsa u shpëtuan nga Mbrojtja Civile të cilët i dërguan në një zonë të sigurt.
Në komuna të ndryshme të Siçilisë, nga Katania në Mesina nga Sirakuza në Ena, shkollat e të gjitha niveleve do të qëndrojnë të mbyllura.
Dhjetëra fluturime janë anuluar ose janë devijuar, ndërkohë dhe në porte situata ka qenë e vështirë për shkak të erërave të forta.
