Policia e Tropojës ka arrestuar 3 persona të shpallur në kërkim për plagosje me dashje. Në operacionin Raja u arrestuan babai Nikë Markaj, 45 vjeç dhe dy djemtë e tij, Gjon Markaj, 23 vjeç dhe Aleks Markaj 22 vjeç, banues në fshatin Tetaj.
Për këta persona, Gjykata e Rrethit Tropojë ka caktuar masën e sigurisë “Arrest në burg”, në mungesë, për plagosje të rëndë me dashje të kryer në bashkëpunim, si edhe për shkatërrim prone dhe mbajtje pa leje e armëve të ftohta.
Ngjarja për të cilën akuzohen ka ndodhur më 30 korrik, ku në aksin rrugor Lekbibaj-Fierzë, në afërsi të vendit të quajtur “Shkëmbi i Rajës”, këta shtetas, në bashkëpunim me njëri-tjetrin, pas një konflikti për motive të dobëta, kanë goditur me thikë shtetasin P. Gj., 44 vjeç, banues në Fierzë. Gjithashtu, në bashkëpunim me njëri-tjetrin i kanë dëmtuar automjetin këtij shtetasi.