Kulturë Polanski, regjisori që po vë në siklet kinemanë franceze

Polanski, regjisori që po vë në siklet kinemanë franceze

Situata e Roman Polanski-t, i vënë në shënjestër nga një akuze e re për përdhunim, të cilën ai e mohon, ka vënë në siklet kinemanë franceze, e dyshuar rregullisht për mbrojtjen e tepruar të regjisorit franko-polak. I nderuar me çmimin Oscar, ai është ende në proces me drejtësinë amerikane për fakte që datojnë nga viti 1977.

Që nga botimi të premten i dëshmisë së fotografes Valentine Monnier, e cila thotë se është rrahur dhe dhunuar nga Roman Polanski në Zvicër, në vitin 1975, në moshën 18-vjeçare, industria e filmit ka mbetur mjaft e heshtur.

Kjo mungesë reagimesh bie ndesh me mesazhet e shumta mbështetëse që iu drejtuan javën e kaluar aktores Adèle Haenel, e cila akuzoi regjisorin Christophe Ruggia për “prekje” dhe “ngacmim seksual” kur ishte adoleshente.

Akuza e bërë nga Valentine Monnier është e para e bërë nga një franceze dhe u shtohet shumë akuzave të viteve të fundit, që të gjitha të mohuara nga regjisori 86-vjeçar.