Kryeministri Edi Rama nga Konispoli i ktheu përgjigje deklaratës së kreut të shtetit, Ilir Meta i cili disa herë në deklaratat e tij është shprehur i shqetësuar për pluralizmin në vend, si pasojë e situatës politike.
“Këtu është një garë pa kandidat përballë, edhe pse po të ishte, mund edhe të mos fitonte. Siç do ndodhte edhe me Lulin që edhe vetëm po të ishte në zgjedhje s’do i fitonte. Po kjo nuk është zgjedhje jonë. S’i kemi penguar ne, është vendimmarrja e tyre” – tha Rama.
“E kam dëgjuar edhe Metën të përsërisë se është i shqetësuar për pluralizmin. Pluralizmi është dakordësia e të gjithëve që populli zgjedh me votë, po gjithësecili e ka në dorë të hyjë a të mos hyjë për të marrë votën. Ata e vendosën vetë. S’i kanë bërë nder Shqipërisë me këtë vendim, por Shqipëria do e kapërcejë këtë situatë të vështirë, e ata do të humbasin. S’ka njeri që të të falë, që të ka dhënë votën e të marrësh mandatin e ta përdorësh si një leckë.
Rama nuk la pa përmendur edhe përgjimet e publikuara nga “Bild”. “Të jeni të sigurt, gjithë shqiptarët e ndershëm nuk kanë për ta falur. Kjo është pjesë e një plani ogurzi për t’i bërë Shqipërisë një të zezë duke e kthyer në njollë që tërheq vëmendje e shkakton ndjenja negative. Pse ndodh kjo? Pse u larguan nga zgjedhjet? Pse morën ato përgjimet e shpifura e i ruajtën për këtë periudhë, Pse dalin në Gjermani? – shtroi pyetjet Rama.
“Sepse nëse janë arsye për hetim kanë që në 2016, duhet të dilte e vërteta. Politika ka qenë e lidhur si pjesë e planit me shfrytëzimin e asaj shpifësire. Kjo për të gjithë ata që kanë sy për të parë e vesh për të dëgjuar. Për fat populli mund të ketë shumë gjëra jo të mjaftueshme, por po të jetë puna për politikë është kampion bote” – u shpreh Rama.
