Kryeministri Edi Rama në video-mesazhin e dhënë sot në Facebook, ka paralajmëruar për heqje lirie dhe ata persona që mbajnë punëtorë në të zezë, duke u bërë edhe një herë thirrje të gjithë personave që kanë qenë në punë të zezë dhe në këtë kohë nuk kanë të ardhura, që t’i denoncojnë.
“Po mendojmë dhe një masë për ata që mbajnë punëtorë në të zezë, që mund të shkojë deri në heqje lirie”, tha Rama.
Rama tha se janë vërejtur shumë persona që ende punojnë në të zezë dhe që nuk janë deklaruar nga kompanitë e ndryshme.
Për këto subjekte, kryeministri theksoi se do të bëhen verifikime dhe personat do të paguhen pikërisht nga këto subjekte.
“Nëse do të thonim që do paguanim të gjithë ata që kanë punuar në të zezë do të vinin edhe këta që punojnë në Facebook dhe do vinin të thonin që kam punuar në të zezë.
Ne kemi bërë këtë që ata që punojnë në një kompani në të zezë dhe sot janë në hall ta dënojnë që ne të bëjmë verifikimin dhe ti themi personit ti do ta paguash këtë.
Nëse po thua që po vdes për bukë, po më vdes familja, nuk je në aq gjendje që të denoncosh personin se po të vdes familja për bukë? Atëherë në këtë pikë askush nuk të ndihmon dot”, tha Rama.
