Zëvendëskryeministri Erion Braçe ka komentuar protestën e sotme të opozitës, në një intervistë për A2 CNN, ku vlerësoi zhvillimin paqësor të saj, ndryshe nga sa ndodhi të shtunën e kaluar.
“Sot besoj që u kthyem në parametrat e duhur të sjelljes, në respekt të ligjit dhe në respekt të qytetarëve të tjerë të Tiranës. U protestua paqësisht dhe janë në të drejtën e tyre ta bëjnë këtë ku të duan”.
Por çfarë do të ndodhë me Parlamentin tani që deputetët e opozitës dorëzuan shkresat e dorëheqjes nga mandati?
Për Braçen, secili ndërton një marrëdhënie me votuesit e vet.
“Por Parlamenti është funksional, në momentin që ka 71 vota. Në momentin që humbet qoftë edhe një, Parlamenti ezauron mandatin e tij”, shprehet zëvendëskryeministri.
Megjithatë, largimi i opozitës nga Parlamenti sjell një shqetësim. “Në aspektin e integrimit europian ky është problem shumë i madh”, thotë Braçe.
“Këta deputetë po i bëjnë dëm Shqipërisë, të ndikuar nga partitë e tyre dhe një grusht njerëzisht që i kontrollojnë ato. Por zgjedhjet e parakohshme zhvillohen kur mazhoranca nuk ka më vota në Parlament”.
“Mendoj që qeveria, tashmë e vetme, ka një barrë të shtuar për të bërë gjënë e duhur në raport me qytetarët”, shton Braçe, duke iu përgjigjur edhe Presidentit Meta për nevojën për hapa pas nga ana e shumicës: “Në aspektin kushtetues dhe të drejtësisë, vendi, jo ne, nuk ka nevojë për hapa pas. Shqipëria nuk ka nevojë për hapa pas”.
