I njohur zakonisht si sulm në zemër, 80% e infarkteve “ndodhin për shkak të një bllokimi në një nga arteriet e zemrës si pasojë e një tromboze ose një pllake ateromatoze, pra për shkak të një grumbullimi të substancave brenda murit të arteries, që përfundon duke i bllokuar ata.”
Fazat e sulmit në zemër janë: arteriet koronare ngushtohen, oksigjeni nuk arrin në miokard, miokardi, duke mos marrë oksigjen, nuk mund të prodhojë energji për të lëvizur dhe qelizat e indeve që nuk marrin gjak vdesin.
Por jo vetëm duke parandaluar faktorët e rrezikut jemi të sigurt nga një atak në zemër, pasi mund të vuajmë edhe pa pasur ndonjë faktor rreziku për shkak të “akumulimit progresiv të kolesterolit dhe substancave të dëmshme për arteriet”, shprehet kardiologu spanjoll Pablo Jorge Pérez.
“Sa më i vjetër të jeni, aq më i madh është rreziku i sëmundjes koronare të zemrës”, shton eksperti.
Simptomat e një ataku në zemër
Shumë njerëz nuk e dinë se ka simptoma para një infarkti të miokardit që mund të paralajmërojnë se diçka nuk është në rregull: “Simptoma kryesore që duhet të na vërë në gatishmëri është dhimbja e gjoksit e shkaktuar kryesisht nga sforcimi dhe që largohet kur qetësohemi ose pushojmë. Gjithashtu, duhet të bëhemi merak kur ndjejmë lodhje me mundime të vogla.
Një simptomë tjetër është pamundësia për të bërë ushtrime që mund të bënim më parë për shkak të dhimbjes ose shqetësimit në gjoks që fillon në qendër dhe zakonisht shkon drejt krahut të majtë ose të djathtë, shpatullës ose shpinës.
Simptoma më tipike e një ataku kardiak “është një ndjesi shtrëngimi ose dhimbje që vështirëson frymëmarrjen, me shtrëngimin që shkon deri në krahun e majtë ose nofull dhe që zakonisht shoqërohet me një gjendje të keqe të përgjithshme, djersë të ftohta, zbehje, të vjella dhe marramendje”.
Siç tregon Pérez, në shumicën e rasteve “jo të gjitha simptomat shfaqen, por një kombinim i ndryshëm i disa prej tyre”. Herë të tjera, shton ai, “shfaqet me dhimbje në pjesën e sipërme të barkut, vështirësi në frymëmarrje dhe humbje të vetëdijes”.
Nëse pësojmë një atak në zemër, gjëja e parë që duhet të bëjmë është “të telefonojmë menjëherë shërbimet e urgjencës dhe të qëndrojmë në qetësi”. Nëse është një person tjetër ai që e vuan, “do të thirret urgjenca dhe pacienti do të qetësohet duke demonstruar siguri dhe se gjithçka është nën kontroll. Ai duhet të jetë në pushim të plotë dhe duhet të përpiqemi të mos e lëvizim duke e lënë të shtrirë, të jemi vigjilentë dhe nëse humbet vetëdijen dhe nuk ka puls, të fillojmë manovrat e ringjalljes, me masazh kardiak”.
